საქართველოს თავდაცვის სტრატეგიული მიმოხილვის 2017-2020 წლების დოკუმენტში ნათქვამია, რომ ქვეყნის უსაფრთხოების ძირითად გამოწვევად რჩება "რუსეთის მზაობა, ხელყოს მეზობელი ქვეყნების სუვერენიტეტი":

"რუსეთის ფედერაციის მზარდი მილიტარიზაცია, სამხედრო ძალების მოდერნიზება და რეგიონზე ზეგავლენის განმტკიცების მცდელობა ზრდის აგრესიის გაგრძელების რისკს, რაც ნათლად დადასტურდა ყირიმის ანექსიისა და აღმოსავლეთ უკრაინაში განვითარებული მოვლენების დროს".

დოკუმენტში საუბარია იმაზე, რომ კრემლი განსაკუთრებულ აქცენტს გააკეთებს "რბილი ძალის" ელემენტების გაძლიერებაზე, იმისათვის რომ უზრუნველყოს სახელმწიფო ინსტიტუტების შესუსტება, პრო-რუსული საზოგადოებრივი და პოლიტიკური ჯგუფების გაძლიერება და დასავლური საგარეო პოლიტიკური კურსის დისკრედიტაცია:

"რუსეთი გააგრძელებს ძალისხმევას საქართველოს ეროვნული ერთიანობისა და სამოქალაქო თანხმობის დასუსტების, ეთნიკურ და რელიგიურ ჯგუფებს შორის შუღლის გაღვივებისა და მართვადი დესტაბილიზაციის შექმნის მიმართულებით".

თავდაცვის სტრატეგიის მიხედვით, რუსეთის ფედერაცია პოლიტიკური და ეკონომიკური ბერკეტების გამოყენებით ისევ ცდილობს, რომ საქართველოს შეუზღუდოს, როგორც საერთაშორისო პოლიტიკური მხარდაჭერა, ისე თავდაცვისუნარიანობის გაძლიერებისაკენ მიმართული საერთაშორისო თანამშრომლობის გაღრმავების შესაძლებლობები.