საკონდიტროების ქსელ გურმეს წელს 10 წელი შეუსრულდა. 2012 წელს ფალიაშვილის ქუჩაზე ერთი ფილიალიდან დაწყებული ბიზნესი წარმატებულ საწარმოდ გადაიქცა და პროდუქციის არჩევანიც გაიზარდა.

მთავარი მაინც საკონდიტრო ნაწარმია, თუმცა ნებისმიერი ტიპის პროდუქციის მზადებისას, კონცეფცია უცვლელია — უმაღლესი ხარისხის ნედლეული, გემრიელი პროდუქტი და მისაღები ფასი. წლების განმავლობაში ეს ღირებულებები არ შეცვლილა და კომპანიის წარმომადგენლებსაც მიაჩნიათ, რომ წარმატების საიდუმლო სწორედ ესაა.

არც ერთი უკმაყოფილო მომხმარებელი

ამბობენ, რომ 10 წლის განმავლობაში, გურმეს არ დაუკარგავს არც ერთი კორპორაციული და საცალო მომხმარებელი. ნაცნობი სახეები მათთვის ყველაზე დიდი მოტივაციაა, რადგან პროდუქტის გემოსა და მაღალ ხარისხზე მეტყველებს. სწორედ ამიტომ გადაწყვიტეს გაფართოება და თბილისში ახლა ორი ფილიალი ფუნქციონირებს: საწარმო და კაფე დიდ დიღომში, მირიან მეფის 70 ნომერში და კაფე გურმე კარტოზიას 10 ნომერში.

ჯანსაღი, მზა საკვები, გერმანიიდან შემოტანილი ფქვილით დამზადებული, 40-ზე მეტი სახეობის პური და ფუნთუშეული, ფრანგული და ქართული ნამცხვრები, ტორტები და, რაც ამ სეზონზე ყველაზე მთავარია, პასკები — გურმეში ცდილობენ, წლიდან წლამდე ასორტიმენტი გააფართოვონ და მომხმარებელს მრავალფეროვანი არჩევანი შესთავაზონ. ახლა აქტიურად მუშაობენ სააღდგომო სამზადისზე.

სააღდგომო სამზადისი

სხვადასხვა ზომისა და შიგთავსის პასკები მაღალი ხარისხითა და მისაღები ფასით გამოირჩევა. გურმეში სტანდარტული, 850-გრამიანი პასკის საშუალო ფასი 20 ლარია. მზადდება როგორც ტრადიციული რეცეპტით, ისე — ცუკატებით, შოკოლადის მარცვლებითა და სხვადასხვა დიზაინის მორთულობით.

თუმცა, ძირითადი რეცეპტი უცვლელია — კვერცხი, უმაღლესი ხარისხის ფქვილი, პარლამატის რძე, პრეზიდენტის კარაქი, ილი, მუსკატი, ქიშმიში, ვანილი და ლიმონი. გურმეში მიაჩნიათ, რომ იდეალურ გემოს მხოლოდ მაღალი ხარისხის ნედლეულის გამოყენების შედეგად მიიღებენ.

კომპანიის წარმომადგენლები ფიქრობენ, რომ, ისევე როგორც შარშან, წელსაც დიდი მოთხოვნა იქნება ტრადიციულ ხაჭოს პასკაზე. ამიტომ ამ მიმართულებითაც უკვე აქტიურად დაიწყეს მუშაობა. ამ სეზონზე დატვირთვა ყოველთვის დიდია, რადგან საცალო მომხმარებლების გარდა, გურმე კორპორაციულ შეკვეთებზეც მუშაობს. ამბობენ, რომ დატვირთული სეზონისთვის მზად არიან და ისევე, როგორც გასული წლების განმავლობაში, მომხმარებელს წელსაც უამრავ სიახლეს შესთავაზებენ.