საფარის განცხადებით, 2022 წლის იანვარში ბათუმში უკრაინის მოქალაქე ქალი გააუპატიურეს, თუმცა მას დაზარალებულის სტატუსი ჯერ კიდევ არ აქვს. ორგანიზაციაში აცხადებენ, რომ ქალი მათ დაახლოებით 1 თვის წინ დაუკავშირდა, მათ დაზარალებულად ცნობის მოთხოვნით, თუმცა პასუხი ამ დრომდე არ მიუღიათ.

"იმყოფებოდა ახალი წლის აღსანიშნავად, სადაც მას მიაღებინეს მისთვის უცნობი ტიპის, ალკოჰოლური თუ სხვა ტიპის ნივთიერება, შემდეგ გადაიყვანეს სხვა ადგილზე. ამის შემდეგ ადამიანს პრაქტიკულად აღარ ახსოვს კარგად, რა ხდებოდა. გაუპატიურების მომენტები ძალიან ფრაგმენტულად ახსოვს.

ისიც არ იცის ერთი ადამიანი იყო, თუ რამდენიმე ადამიანი მონაწილეობდა გაუპატიურებაში. როდესაც აზრზე მოვიდა, იყო გახდილი, ჰქონდა დაზიანებები და უკვე მეორე დღეს, 16-ში მიმართა პოლიციას. პრობლემა მდგომარეობს იმაში, რომ გარკვეული საგამოძიებო მოქმედებები ჩატარდა, მაგრამ ჩვენთვის რამდენადაც ცნობილია, მთელი რიგი საგამოძიებო მოქმედებები და დღემდე ამ ქალს არ აქვს დაზარალებულის სტატუსი", — ამბობს საფარის აღმასრულებელი დირექტორი ბაია პატარაია.

მისივე თქმით, ქალს დაკითხვის დროს ქალს თარჯიმანი არ ჰყავდა და არ იცის რას მოაწერა ხელი, რადგან ტექსტი ქართულ ენაზე იყო დაწერილი.

"ჩვენ 3 კვირის წინ დაგვიკავშირდა, ვინაიდან მიიჩნევდა, რომ გამოძიება არ მიდის ეფექტურად. ასევე, ის ყვება, რომ მეორე დაკითხვის შემთხვევაში არ ჰყავდა თარჯიმანი და არ იცის რას მოაწერა ხელი იმიტომ, რომ ქართულად დაწერილ ტექსტს მოაწერინეს ხელი. იმის გამო, რომ არ აქვს დაზარალებულის სტატუსი, ჩვენც არ გვაქვს საშუალება, რომ გავეცნოთ გამოძიებაში რა მასალები დევს და რამდენად ეფექტურად ხორციელდება გამოძიება.

სქესობრივ დანაშაულებში სერიოზული პრობლემაა ამ ქვეყანაში. განსაკუთრებით უნდა აღვნიშნო, რომ პრობლემაა თუ უცხოელი არის ქალი. კიდევ უფრო მეტად სტერეოტიპული დამოკიდებულება არსებობს მის მიმართ და ჩვენს მართლმსაჯულების სისტემას არ სჯერა ხოლმე, რომ უცხოელი ქალიც შეიძლება იყოს გაუპატიურებული და მიაჩნია, რომ ყველა ეს შემთხვევა თანხმობითაა განხორციელებული", — ამბობენ საფარში.

საფარი ითხოვს:

• საქმის წამროება გადაეცეს პოლიციის სხვა განყოფილებას, რადგან არ ენდობიან იმ პოლიციელებს, რომლებმაც უკრაინის მოქალაქე ქალი გამოკითხეს თარჯიმნის გარეშე;
• დაუყოვნებლივ მიენიჭოს დაზარალებულის სტატუსი ქალს;
• დაიწყოს სისხლის სამართლებრივი დევნა სავარაუდო დამნაშავის მიმართ.