პარტია საქართველოსთვის ლიდერის, გიორგი გახარიას განცხადებით, მომდევნო 4 კვირა ქვეყნისთვის უმნიშვნელოვანესია. მისი თქმით, საქართველოს ევროკავშირის წევრობის კანდიდატის სტატუსის მინიჭებაზე გადაწყვეტილება უახლოეს 4 კვირაში იქნება მიღებული. გახარია ამბობს, რომ მნიშვნელოვანია გაერთიანება.

"ჩვენ შეიძლება, ერთმანეთი არ მოგვწონდეს, შეიძლება, ერთმანეთს ვებრძოდეთ, შეიძლება, ერთმანეთი გვეზიზღებოდეს, მაგრამ როდესაც საქმე ეხება საკითხს, რომელიც განსაზღვრავს ჩვენი ქვეყნის მომავალ 10-წლეულების ცხოვრებას. იმ ცხოვრებას, რომელზეც ჩვენმა შვილებმა გადაწყვეტილება მიიღეს. მათთვის წარმოუდგენელია რუსულ წარსულში დაბრუნება. მათთვის ერთადერთი გამოსავალია, მხოლოდ და მხოლოდ ევროპული განვითარება. გავჩუმდეთ, ერთადერთი რასაც მოვუწოდებ 4 კვირა მაინც გაჩუმდნენ, რომ 4 კვირის განმავლობაში მაინც არ ლანძღონ ერთმანეთი", — ამბობს ის.

გახარიას თქმით, ამ ოთხი კვირის განმავლობაში არანაირი მნიშვნელობა არ აქვს, ვინ მოსწონს და ვინ არა. როგორც ამბობს, რჩება შთაბეჭდილება, რომ ქართული ოცნება მზადაა ნებისმიერი ფასი გადაიხადოს ძალაუფლების შესანარჩუნებლად. ხოლო ოპოზიცია, ნაციონალური მოძრაობა, მისივე თქმით, მზადაა ნებისმიერი დასი გადაიხადოს, რათა ეს ძალაუფლება დაიბრუნოს.

"ერთადერთი ფასი, რაც ერთ გაკოტრებულს და მე-2 გაკოტრებულს დარჩა, ეს არის ივაჭრონ ქვეყნის მომავლით", — თქვა გახარიამ.

ყოფილი პრემიერი საუბრობს, რომ არ იცის, რა მიზანი აქვთ, მაგრამ შედეგი იქნება ქვეყნის იზოლაცია.

" არ აქვს მნიშვნელობა ვინ არის ოპოზიცია თუ ხელისუფლება. ვისაც მართლა, გულწრფელად სურს, საქართველომ მიიღოს კანდიდატის სტატუსი იმის მაგივრად, რომ თავს ესხმოდეს თავის ოპონენტებს ან ერთმანეთს, იყოს მხოლოდ და მხოლოდ ბრალდებებით დაკავებული. უბრალოდ თუ ერთად დგომა არ შეგვიძლია, უბრალოდ უნდა გაჩუმდეთ, უნდა გაჩუმდნენ, არ ლანძღონ ერთმანეთი, არ დაუპირისპირდნენ ერთმანეთს უსაფუძვლო ბრალდებებით. წარმოიდგინეთ ერთი რამ, უახლოესი 4 კვირის განმავლობაში, უაღრესად დიდი მნიშვნელობა ექნება საქართველოს და ქართული პოლიტიკური ელიტების თუ ქართველი ხალხის, მოქალაქეების ერთიანობის შესაძლებლობას. როგორ შეგვიძლია თითოეულ ჩვენგანს, გავერთიანდეთ რაღაცის ირგვლივ მაინც", — აცხადებს ის.

საქართველომ ევროკავშირის კანდიდატის სტატუსის მიღებაზე განაცხადი, უკრაინასა და მოლდოვასთან ერთად გააკეთა. უკვე შეავსეს კითხვარიც და ის ევროკავშირს გადასცეს.