საქართველოსა და სომხეთის პრეზიდენტებმა ორბელიანების სასახლეში გაფართოებულ ფორმატში გამართული შეხვედრების შემდეგ ერთობლივი ბრიფინგი გამართეს. ზურაბიშვილის თქმით, რეგიონში სრული მშვიდობის დამყარება სომხეთისა და აზერბაიჯანის მოლაპარაკებების შედეგებზეა დამოკიდებული.

"ჩვენი რეგიონის მომავალი მჭიდროდაა დამოკიდებული მშვიდობიან გარემოზე და ვიმედოვნებთ, რომ სომხეთსა და აზერბაიჯანს შორის მოლაპარაკებები წარმატებულად გაგრძელდება. ამ კუთხით მივესალმებით ევროკავშირის ჩართულობას და ვიცით, რომ ამ მოლაპარაკებების შედეგებზეა დამოკიდებული რეგიონში სრული მშვიდობის დამყარება. მშვიდობის დამყარებაზეა დამოკიდებული ეკონომიკური განვითარება და ყველა ის ახალი გეგმები, რომლებიც რეგიონს ეხება და მას სამომავლო ძალიან დიდ პერსპექტივას უქმნის", — განაცხადა მან.

პრეზიდენტმა უკრაინაში მიმდინარე ომზე ისაუბრა და თქვა, რომ რეგიონი ახალი გამოწვევების წინაშე დგას. მისი თქმით, რუსეთი აგრესია საერთაშორისო ნორმებსა და პრინციპებს არღვევს. მან, ასევე, ხაზი გაუსვა საქართველოს ოკუპირებულ ტერიტორიებზე არსებულ ვითარებასაც,

"სუვერენობის უგულებელყოფა და ადამიანის უფლებების უხეში დარღვევა გრძელდება და მძიმდება, რასაც დღეს, 17 ივლისს დაგეგმილი რეფერენდუმის სახით ახალი მუქარაც ემატება. თუმცა, ამავე დროს, ევროპული ინტეგრაციის გზაზე გამოჩენილი ახალი შესაძლებლობები ჩვენი ქვეყნისა და ასევე, ამ რეგიონისთვის, რომელიც აღმოსავლეთ პარტნიორობის ფარგლებში შედის, ძალიან დიდ შანსს წარმოადგენს", — თქვა ზურაბიშვილმა.

ზურაბიშვილმა ორ ქვეყანას შორის არსებულ 30-წლიან დიპლომატიურ ურთიერთობებსაც შეეხო. მისი თქმით, მიუხედავად რთული პერიოდისა, სომხეთსა და საქართველოს შორის ურთიერთობები ყოველთვის კეთილმეზობლურია.

"აღვნიშნეთ, საქართველოში არსებული ყველა პირობა, რათა სომხური წარმოშობის ქართველმა მოქალაქეებმა შეინარჩუნონ საკუთარი ენა და კულტურა და ამავდროულად, შეძლონ ქვეყნის ცხოვრებაში აქტიური მონაწილეობის მიღება. ამ კუთხით, ძალისხმევა არ შენელდება.

ჩვენს ქვეყანაში სომხური და აზერბაიჯანული წარმოშობის მოქალაქეების თანაცხოვრება ქვეყანაში შექმნილ შემწყნარებლურ გარემოზე მეტყველებს და კავკასიის რეგიონისთვის კავკასიის ტრადიციის გამგრძელებელ პოზიტიურ მაგალითს წარმოადგენს", — თქვა მან.

ზურაბიშვილის თქმით, დელეგაციებმა შეხვედრაზე ხაზი გაუსვეს "ქვეყნებს შორის არსებულ კავშირებსა და თანამშრომლობის ზრდის პოტენციალს — სატრანსპორტო და მაღალი ტექნოლოგიების სფეროებში".

სომხეთის პრეზიდენტი, ვაჰაგნ ხაჩატურიანი საქართველოში ოფიციალური ვიზიტით დღეს, 30 მაისს ჩამოვიდა.