უკრაინელი ლტოლვილები საქართველოში მოქმედი დეზინფორმაციული წყაროების სამიზნე არიან. პრორუსები ცდილობენ ისინი არეულების გამომწვევებად წარმოაჩინონ.

რატომ არის მნიშვნელოვანი: ლტოლვილების და მიგრანტების საკითხი სენსიტიური თემაა, რომელსაც ხშირად იყენებენ უარყოფით კონტექსტში, საზოგადოების შიშებზე ზემოქმედებისთვის.

• კრემლის აქტორები ცდილობენ, ლტოლვილებისადმი უარყოფითი დამოკიდებულება გააღვივონ და საზოგადოების მიმღებლობა შეამცირონ.
• მსგავსი დეზინფორმაცია ეხმარება რუსეთს, რომ უკრაინა არა მსხვერპლად, არამედ დამნაშავეების ქვეყანად წარმოაჩინოს.

დეტალები: Grass-ის ანგარიშის მიხედვით, ვრელდება დეზინფორმაცია თითქოს, სომხეთში ლტოლვილები ნაცისტურ სიმბოლიკას იყენებენ, ამიტომ ადგილობრივებმა ტრადიციების პატივისცემა მოითხოვეს.

• პრორუსები ამტკიცებენ იმასაც, თითქოს პრაღაში უკრაინელებს ბაზარზე შესვლაზე უარს ეუბნებიან, რადგან ხშირად ქურდობენ.
• პრორუსული სეზონი TV-ის წამყვანმა, რომელიც ობიექტივსა და ალტინფოშიც მუშაობდა, იმის მტკიცება დაიწყო, რომ უკრაინელი ლტოლვილები პროვოკატორები და რევოლუციის მოსურნეები არიან.

სინამდვილეში, ფეისბუქანგარიშმა სულიერი სამყარო, რომელიც არაიდენტიფიცირებული პროფილია, გაავრცელა რუსეთის და სომხეთის დროშის ფონზე მდგომი, პრორუსი პირის ვიდეო. სწორედ ის ამტკიცებდა, რომ უკრაინელი ლტოლვილები სომხებს პატივს არ სცემენ.

• ხოლო პრაღაში თითქოსდა მაღაზიებზე მიკრული განცხადება უკრაინელების არდაშვებაზე, ყალბი აღმოჩნდა. ადგილობრივ მედიას მფლობელებმა განუცხადეს, რომ მსგავსი არაფერი გაუკეთებიათ.
• რაც შეეხება სეზონი TV-ს, ის პროვოკაციად უკრაინელების აქციაზე ანტიპუტინისტურ განცხადებებს აფასებს. ხოლო ენმ-სთან კავშირებით ვინმეს გაშავების მცდელობა და მათთვის ომში ჩათრევის დაბრალება პროპაგანდისტული ნარატივების ქვაკუთხედია.

სხვა დეზინფორმაციული გზავნილები: ჩვენს მკითხველს უკვე ვუამბეთ, რომ ომის დაწყების დღიდანვე რუსეთი და მისი აქტორები სხვადასხვა ქვეყანაში დეზინფორმაციულ ომში ჩაერთვნენ, ამიტომ უკრაინა 2 ფრონტზე იბრძვის.

• მაგალითად, პრორუსები და პროსახელისუფლებო ქართული გვერდები მხარდამხარ აშავებენ უკრაინის პრეზიდენტს;
• გარდა ამისა, აკრიტიკებენ აზოვის ბატალიონს და უკრაინელებს ნაცისტობას აბრალებენ;
• მათივე მტკიცებით, დასავლური სანქციები არ მუშაობს და რუსეთი უკრაინაში მნიშვნელოვან სამხედრო წარმატებას აღწევს, რაც არაფრით დასტურდება.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში.