სახელმწიფო ბორჯომის თანამფლობელი ხდება. IDS BORJOMI International-ის განცხადებით, მაკონტროლებელმა აქციონერმა მთავრობას უსასყიდლოდ 7,73%-იანი წილი გადასცა. ეკონომიკის მინისტრის განმარტებით, ERASMONY LIMITED-ის საკუთრებაში არსებული, ბორჯომის მმართველი კომპანია RISSA INVESTMENT LIMITED-იდან მათ 1 104 აქცია გადაეცათ.

რატომ არის მნიშვნელოვანი: კომპანია ბორჯომმა 29 აპრილიდან სანქციების გამო ორივე ქარხანაში წარმოება დროებით შეაჩერა, 5 მაისს კი 49 თანამშრომელი გაათავისუფლა.

• კომპანიაში თქვეს, რომ შექმნილ ვითარებაში იძულებული გახდნენ დასაქმებულთა ხელშეკრულებაში ცვლილება შეეტანათ, რაზეც თანამშრომელთა ნაწილი არ დათანხმდა.
• 19 მაისს ცნობილი გახდა, რომ IDS BORJOMI International-ის მაკონტროლებელმა კომპანიამ საქართველოს მთავრობას წარუდგინა ოფიციალური წინადადება წილების ნაწილის უსასყიდლოდ გადაცემის შესახებ.

შეთანხმების დეტალები: ლევან დავითაშვილის განცხადებით, სახელმწიფო დირექტორთა საბჭოში ორი პირითაა წარმოდგენილი — ერთი იქნება ხმის უფლების მქონე, მეორე კი დამკვირვებელი.

• საბჭოში მაკონტროლებელი აქციონერის წარმომადგენლობა 8-დან 2 წევრამდე შემცირდება.
• საბჭოს თავმჯდომარე საქართველოს მთავრობის წარმომადგენელი იქნება.
• მაკონტროლებელ აქციონერს აღარ ექნება IDS BORJOMI International-ის მაკონტროლებელი ფუნქცია.

რიცხვებში: ERASMONY LIMITED იქნება აქციების 49,99%-ის მფლობელი.

• მეორე მსხვილი აქციონერი არის კომპანია Black Waters Limited აქციების 38,48%-ით.
• საქართველოს სახელმწიფო ფლობს აქციების 7,73%-ს.
• ასევე კომპანიას ჰყავს მინორიტარი აქციონერები — 3,79%-ს ფლობენ ბორჯომის ყოფილი თანამშრომლები და სხვადასხვა აქციონერები.

ბორჯომის თანამშრომლები 31 მაისს უვადოდ გაიფიცნენ, 6 ივნისს კი ორივე ჩამომსხმელი ქარხნის პიკეტი დაიწყეს.

• ისინი ითხოვენ გათავისუფლებული თანამშრომლების აღდგენასა და აპრილისა და მაისის თვის ხელფასების ჩარიცხვას.
• მათი განცხადებით, კომპანიას სურს, ქარხნის თანამშრომელთა ჩანაცვლება — IDS ბორჯომი კი ამბობს, რომ არც ერთი ახალი თანამშრომელი არ დაუქირავებიათ.

ღარიბაშვილის თქმით, გაფიცული თანამშრომლების "ყველა პრობლემას მოაგვარებენ"

• "არცერთი არ დარჩება სიმართლის გარეშე, არცერთი მოქალაქე არ დაიჩაგრება".

სახალხო დამცველის, ნინო ლომჯარიას განცხადებით, გაფიცული თანამშრომლებისგან დისკრიმინაციის მაგალითები და გამოცდილება მოისმინა.

• მისივე თქმით, კომპანია ადამიანებს იმის მიხედვით არ უხდის, ვის რა როლი აქვს ამ გაფიცვაში.