საქართველოს უსინათლოთა კავშირის 12 თანამშრომელი სამსახურიდან უკანონოდ გათავისუფლებას აპროტესტებს. სამი მათგანი უკვე მეათე დღეა შიმშილობს.

რატომ არის მნიშვნელოვანი: სახალხო დამცველის განცხადებით, უსინათლოთა კავშირის მხრიდან იკვეთება კონსტიტუციითა და შრომის კანონმდებლობით გარანტირებული შრომითი უფლებების დარღვევის ნიშნები.

• შიმშილობა პროტესტის უკიდურესი ფორმაა და ამ ადამიანების ჯანმრთელობისა და სიცოცხლისათვის საფრთხის შემცველია.

დეტალები: თორმეტივე პირმა დარღვეული შრომითი უფლებების აღდგენის მიზნით, უკვე მიმართა საქალაქო სასამართლოს და სარჩელი წარმოებაში მიღებულია.

• დღეს ერთ-ერთი მოშიმშილე, 9 აპრილის მოვლენების სიმბოლო, ლელა ვეფხვაძე შეუძლოდ გახდა.
• "უსამართლოდ გათავისუფლებულები ვართ, გვინდა სამართლიანობის აღდგენა. მგონი ამაში მიუღებელი არაფერი არ უნდა იყოს. აქ მარტო ხელფასი არაა. უსინათლო ადამიანისთვის რეალიზება იმისი, რისი უნარიც აქვს არის ძალიან ძნელი. ჩვენ აქ ჩვენი ნიჭის, ჩვენი შესაძლებლობის რეალიზებას ვახდენდით და ესეც მოგვისპეს", — ამბობს ლელა ვეფხვაძე.

სახალხო დამცველის თქმით, მხარეებს შორის მიმდინარეობს მოლაპარაკებები და შესაძლებელია საკითხი ურთიერთშეთანხმების გზით გადაწყდეს.

• ომბუდსმენი მიმართავს უსინათლოთა კავშირის თავმჯდომარესა და გამგეობის წევრებს, პოზიციების კონსტრუქციული შეჯერებისა და რეალური მდგომარეობის გათვალისწინებით, ურთიერთმოლაპარაკებით მიაღწიონ შეთანხმებას შრომითი უფლებების აღდგენის თაობაზე.
• ის იმედოვნებს, რომ უფლებამოსილი პირები გაითვალისწინებენ შექმნილ ვითარებას, საკითხის სენსიტიურობას და უმოკლეს დროში მიიღებენ ოპტიმალურ გადაწყვეტილებას, რომელიც ხელს შეუწყობს გათავისუფლებული პირების უფლებების დროულად აღდგენასა და უსინათლოთა კავშირის მუშაობის ნორმალურ რეჟიმში გაგრძელებას.

უსინათლოთა კავშირის თქმით, თანამშრომლები "შრომითი დისციპლინის დარღვევისთვის" გაათავისუფლეს.

• როგორც განცხადებაში ვკითხულობთ, მათ თანამშრომლებს სამსახურში დაბრუნება შესთავაზეს, თუმცა ისინი დაბრუნებისთვის კულტურის, განათლებისა და სპორტის ცენტრის დირექტორის სამსახურში აღდგენას ითხოვენ.
• მათი განცხადებით, 12 თანამშრომლიდან ერთ-ერთმა უკვე განაახლა მუშაობა.
• უსინათლოთა კავშირი ეხმაურება სახალო დამცველის განცხადებასაც და ამბობს, რომ ომბუდსმენის აპარატი "ზერელე" ინფორმაციას ავრცელებს.
• ორგანიზაცია მოუწოდებს სახალხო დამცველს, რომ სანამ მათ მიმართ კომენტარს გააკეთებს, "ყოველი სიტყვა ათასგზის აწონოს".