24 ივლისს, თბილისში თანამედროვეობის ერთ-ერთი უმნიშვნელოვანესი უკრაინელი კომპოზიტორისა და პიანისტის, ლუბომირ მელნიკის კონცერტი გაიმართება.

ელექტროაკუსტიკური და ექსპერიმენტული მუსიკის საღამოების სერია Zenaari, 24 ივლისს, 20:00 საათზე, Ciskari Garden-ში წარმოგიდგენთ თანამედროვეობის ერთ-ერთი ყველაზე თვალსაჩინო კომპოზიტორისა და პიანისტის, უკრაინელი მუსიკოსის, ლუბომირ მელნიკის საფორტეპიანო კონცერტს.

კლასიკური მუსიკალური განათლებითა და ანტიკური, რომაული კულტურით შთაგონებულმა ლუბომირ მელნიკმა მუსიკალური მოღვაწეობა 70-იანი წლების პარიზში დაიწყო. ექსპერიმენტული ცეკვის ქორეოგრაფთან, კაროლინ კარლსონთან კოლაბორაციით, მან ფორტეპიანოს სრულიად ახალი შესაძლებლობები აღმოაჩინა, როდესაც მკაცრად განსაზღვრული წესების ნაცვლად, იმპროვიზაციულად, მუსიკის აწყობა სწორედ ცეკვასა და სხეულების მოძრაობასთან თანმიმდევრობაში გადაწყვიტა. ინსტრუმენტის პედალის ექსპერიმენტული გამოყენებით, ექოსა და რევერბის მონაცვლეობით, მან შესაძლებელი გახადა ბგერებისა და ხმების შეუჩერებელი დინება, რომელსაც ჰიპნოტური ჟღერადობის მქონე ტალღებად გარდაქმნიდა და ამ ტექნიკას თავადვე უწოდა "უწყვეტი მუსიკა". ობერტონების მდიდარი ლანდშაფტით გამორჩეულმა მისმა შემოქმედებამ საფორტეპიანო და კამერული კომპოზიციებით, სრულიად ახალი განზომილება მისცა ინსტრუმენტს. მუსიკის კრიტიკოსები ამბობენ, რომ ეს სწორედ ის ჟღერადობაა, რისთვისაც ფორტეპიანო შეიქმნა.

"ეს მუსიკა არ შეიქმნებოდა, უკრაინელი რომ არ ვიყო. თავგანწირვა ჩვენი მთავარი თვისებაა, უკრაინელები თავს ვწირავთ იმისთვის, რაც ჩვენთვის ღირებულია", — ასე აღწერს თავად მუსიკოსი შთაგონების მთავარ ძალას.

ელექტროაკუსტიკური და ექსპერიმენტული მუსიკის საღამოების სერია Zenaari 2018 წელს დაფუძნდა და მის ფარგლებში ისეთი მუსიკოსებისა და კომპოზიტორების საკონცერტო საღამოები გაიმართა, როგორიცაა William Basinski, Yves Tumor, Metastasis, HVL, რეზო ღლონტი და.ა.შ.

24 ივლისი | Ciskari Garden | 20:00
FACEBOOK | INSTAGRAM | TKT.GE
ვიზუალური მასალა: https://we.tl/t-dTAW3yBtn3
აკრედიტაციისთვის: info@bassiani.com | 595 800 923