უწყების თქმით, "თავს ვალდებულად თვლიან" საზოგადოებას განუმარტონ, რომ ცენტრის მიერ გავრცელებული ინფორმაცია, სავარაუდოდ, საზოგადოების განზრახ შეცდომაში შეყვანას ისახავს მიზნად.

რატომ არის მნიშვნელოვანი: დღეს, 26 ოქტომბერს სოციალური სამართლიანობის ცენტრმა გაავრცელა ინფორმაცია, რომ წულუკიანს სასამართლო კიდევ ერთმა გათავისუფლებულმა თანამშრომელმა, გუგა გოგაძემ მოუგო.

• ორგანიზაციის ცნობით, სააპელაციო გააუქმა საქალაქო სასამართლოს გადაწყვეტილება, რომელმაც გოგაძეს მოთხოვნები არ დაუკმაყოფილა.
• სასამართლომ ბათილად ცნო კულტურული მემკვიდრეობის დაცვის ეროვნული სააგენტოს გენერალური დირექტორის 2022 წლის იანვრის ბრძანება, გოგაძის თანამდებობიდან გათავისუფლების შესახებ.
• ცენტრი მიუთითებდა, რომ გოგაძე ერთ-ერთია კულტურის სექტორის იმ 70-მდე თანამშრომელს შორის, რომლებიც თეა წულუკიანის კულტურის მინისტრის პოზიციაზე დანიშვნის შემდეგ, "მასობრივი საკადრო წმენდის მსხვერპლი გახდნენ".

დეტალები: როგორც ისინი ამბობენ, ინფორმაცია სააპელაციოს მიერ კულტურული მემკვიდრეობის დაცვის ეროვნული სააგენტოს გენერალური დირექტორის ბრძანების ბათილად ცნობაზე, ყალბია.

• "პირიქით, სასამართლომ, როგორც პირველ, ისე სააპელაციო ინსტანციაში, უარი უთხრა გუგა გოგაძეს სამსახურში იმავე ან ტოლფას თანამდებობაზე აღდგენაზე"
• "სინამდვილეში, სააპელაციო სასამართლოს გადაწყვეტილებით, სააგენტოს აპელანტის სასარგებლოდ დაეკისრა იძულებით გაცდენილი დროის ანაზღაურება გათავისუფლების დღიდან — 15 იანვრიდან გადაწყვეტილების აღსრულებამდე".
• გარდა ამისა, განცხადებაში ნათქვამია ისიც, რომ გოგაძის მოთხოვნა სააპელაციომ კომპენსაციასთან დაკავშირებით ნაწილობრივ დააკმაყოფილა, თუმცა ეს ორგანიზაციის განცხადებაში ისედაც იყო ნახსენები.

სამინისტროში ამბობენ, რომ "თითქოს ტენდენციად იქცა" სხვადასხვა პირის მიერ უწყების ან სსიპ-ების წარმოებული წაგებული დავების მოგებულად გამოცხადება.

• ორგანიზაციების ყურადღების მისაპყრობად ან/და რეიტინგის გასაზრდელად არაზუსტი ინფორმაციის გავრცელების პირველ ადგილზე კულტურის მინისტრის გვარი გამოაქვთ".

კონტექსტი: ეს პირველი შემთხვევა არაა, როდესაც სასამართლომ თეა წულუკიანის მიერ თანამშრომლის გათავისუფლება უკანონოდ მიიჩნია.

• მას შემდეგ, რაც კულტურის მინისტრის პოზიციაზე თეა წულუკიანი დაინიშნა, არაერთი აქცია გაიმართა, სადაც აცხადებდნენ, რომ კულტურის სფეროდან თანამშრომლებს იდეოლოგიური მიუღებლობის გამო ათავისუფლებდნენ.