პარტია გმობს საქმიანობასაც, რომელიც მიმართულია რუსეთის სახელმწიფოს ქმედებათა გამართლებისკენ და დანაშაულთა ნიველირებისკენ.

რატომ არის მნიშვნელოვანი: საქართველოს პატრიარქმა რუსეთის პატრიარქს დაბადების დღე ისევ მიულოცა და რუსეთ-უკრაინას შორის "სამართლიანობის აღდგენა" ისურვა.

• პატრიარქი კირილი პუტინთან დაახლოებული პირი და მისი პოლიტიკის გამტარებელია, მათ შორის, მხარს უჭერს ომს უკრაინაში, რომლის შესახებაც ილია მეორემ არაერთი განცხადება გაავრცელა, თუმცა რუსეთი მხოლოდ ომის 21-ე დღეს ახსენა.
• კირილმა არაერთხელ აკურთხა რუსი სამხედროები, რომლებიც უკრაინაში იბრძვიან.
• ომის დაწყების შემდეგ კი შეიარაღებული ძალებისთვის აშენებულ საკათედრო ტაძარში იქადაგა და თქვა, რომ ხალხმა უნდა გაიღვიძოს და გაიგოს, რომ დადგა "განსაკუთრებული დრო, რომელზეც შეიძლება დამოკიდებული იყოს ხალხის ისტორიული ბედი"

წერილის მიხედვით, ილია მეორემ კირილს ჯანმრთელობა, მშვიდობა და კეთილდღეობა უსურვა.

• "ქრისტესმიერი სიყვარულით გილოცავთ დაბადების დღეს! ამ რთულ დროს გისურვებთ ჯანმრთელობასა და ყველა ღვთიურ სიკეთეს. ასევე ვისურვებ, რომ თქვენი და საერთო ძალისხმევით, რაც შეიძლება მალე აღდგეს სამართლიანობა და მშვიდობა რუსეთსა და უკრაინას შორის, ასევე ჩვენს სახელმწიფოებს შორის", — წერია ტექსტში.
• მიტროპოლიტმა ნიკოლოზმა თქვა, რომ ომი არ არის საკმარისი მიზეზი, პატრიარქმა პატრიარქთან ურთიერთობა გაწყვიტოს.
• გარდა ამისა, ნიკოლოზი ფიქრობს, რომ კირილი სრულიად რუსეთის პატრიარქია და მის ტერიტორიაზე მიმდინარეობს ეს ომი.

ევროპული საქართველო მოუწოდებს საქართველოს მართლმადიდებელ ეკლესიას, დიდი ხნის დაგვიანებით მაინც გაწყვიტონ ნებისმიერი სახის საჯარო და კერძო კავშირი ან კომუნიკაცია რუსეთის სახელმწიფოსა და მის კონტროლირებად ყველა ორგანიზაციასთან, მოსკოვის საპატრიარქოს ჩათვლით.

• "ჩვენ ვაღიარებთ ეკლესიისა და სახელმწიფოს გამიჯვნისა და ურთიერთჩაურევლობის პრინციპებს, რომლებიც დღეს სრულად მოშლილი და დარღვეულია, ამავე დროს, მივიჩნევთ, რომ რუსეთის მართლმადიდებელი ეკლესია არ არის დამოუკიდებელი ინსტიტუტი და წარმოადგენს პუტინის რეჟიმის ინსტრუმენტს ქართული სახელმწიფოებრიობის და მსოფლიოში თავისუფლების წინააღმდეგ და მასთან ნებისმიერ თანამშრომლობა არის მორალურად სრულად გაუმართლებელი", — აცხადებენ პარტიაში.
• ასევე, მოუწოდებენ საქართველოს ყველა პატრიოტს, გამოხატონ სამოქალაქო პოზიცია ყველა, მათ შორის რელიგიურ შეკრებაზე, სადაც არ ხდება პუტინის და მის მიერ კონტროლირებადი ორგანიზაციების მკაფიო შეფასება და მით უმეტეს, ხდება მათი პირდაპირი თუ ირიბი გამართლება.