რატი ბრეგაძემ სააკაშვილის ჯანმრთელობის მდგომარეობაზე გაკეთებულ განცხადებებს დაძაბულობის მუხტის მცდელობები და სახელმწიფოს წინააღმდეგ ცილისმწამებლური კამპანია უწოდა.

რატომ არის მნიშვნელოვანი: გუშინ, 28 ნოემბერს ექსპრეზიდენტის სასამართლო პროცესი უნდა გამართულიყო, თუმცა გადაიდო.

• ადვოკატის თქმით, მიხეილ სააკაშვილს პროცესზე დასწრება სურდა, თუმცა შემდეგ პარტიის წევრმა, ხატია დეკანოიძემ თქვა, რომ ამის საშუალება ექიმებმა ჯანმრთელობის მდგომარეობის გამო არ მისცეს.
• მოგვიანებით, ვივამედის დირექტორმა განმარტა, რომ ექსპრეზიდენტს ნევროლოგის კონსულტაცია ჩაუტარდა, რომელმაც უარყოფითი დინამიკა აჩვენა და გადაყვანა გამართლებული არ იყო.
• იმავე დღეს, გვიან ღამით ენმ-ის წევრმა ლევან ხაბეიშვილმა 3 დეკემბერს, 3 საათზე ქართული ოცნების ოფისთან სააკაშვილის გადაყვანის მოთხოვნით აქცია დააანონსა.

ბრეგაძის თქმით, დაკავების დღიდან დღემდე ექსპრეზიდენტი კანონმდებლობით გათვალისწინებული ყველა უფლებით სარგებლობს, მაგალითად კი ვიზიტორების რაოდენობა მოჰყავს, რომელიც, მისი სიტყვებით, 1 500 იყო.

• ამბობს, რომ ექიმების მიმართ მთელი ამ პერიოდის მანძილზე დისკრედიტაციისა და დაუმსახურებელი უნდობლობის გამოცხადების მცდელობები იყო.
• აღნიშნავს, რომ ეს არაერთხელ დაგმეს და ყველას დაუზუსტებელი ინფორმაციის გავრცელებისგან თავი შეკავებისკენ მოუწოდეს.

საზღვარგარეთ გადაყვანის მოთხოვნაზე, ბრეგაძე ამბობს, რომ სააკაშვილი სასჯერს საქართველოს ტერიტორიაზე, აქ არსებულ პენიტენციურ დაწესებულებებში იხდის, ამიტომ სამინისტროს ამ მოთხოვნის სამართლებრივი ბერკეტი არ გააჩნია.

• "კანონის წინაშე თანასწორობა, ეს არის მთავარი კონსტიტუციური ღირებულება, რომელიც თანაბრად ვრცელდება ამ ქვეყანაში მყოფ ნებისმიერ პირზე და კანონით გაუთვალისწინებელი გამონაკლისი ვერავისთვის იქნება დაშვებული".

შეთავაზება: იუსტიციის მინისტრი აღნიშნავს, რომ ცენტრი ემპათია დამოუკიდებელ ექსპერტიზას ატარებს, რომელშიც ჩართულები უცხოელი ექსპერტებიც იყვნენ და სახელმწიფომ ყველა მათგანს შესაბამისი ნებართვები მისცა.

• დასძენს, რომ "გამომდინარე იმ მაღალი პასუხისმგებლობიდან, რომლითაც სახელმწიფო თითოეული ადამიანის სიცოცხლესა და ჯანმრთელობას ეკიდება", სააკაშვილს ნებისმიერი უცხოური კლინიკიდან ნებისმიერი ექიმის ჩამოყვანას სთავაზობენ.
• "რომელსაც სახელმწიფო მისცემს შესაძლებლობას ჩაერთოს მის მკურნალობაში", — დაამატა ბრეგაძემ.