ინფორმაციას უკრაინის ეკონომიკის სამინისტრო ავრცელებს.

რატომ არის მნიშვნელოვანი: ევტუშენკოვი რუსი ოლიგარქია, რომელიც ვლადიმერ პუტინთან არის აფილირებული. მას, ასევე, კონტაქტები აქვს ქართველ ბიზნესმენებთან, მათ შორის, ბიძინა ივანიშვილთან, დავით ხიდაშელთან და ლევან ვასაძესთან.

• აპრილში, სავარაუდოდ, ვლადიმირ ევტუშენკოვისა და ბიძინა ივანიშვილის სატელეფონო საუბრის ჩანაწერის გავრცელების შემდეგ, სადაც ბიზნესგეგმებს განიხილავდნენ, გაჩნდა ეჭვები, რომ ისინი სანქციებისთვის გვერდის ავლას ცდილობდნენ.
• გავრცელებული ჩანაწერების შემდეგ, უკრაინის უმაღლესი რადას ფრაქცია ხალხის მსახურის თავმჯდომარემ, დავით არახამიამ ევროკავშირსა და აშშ-ს მოუწოდა, ივანიშვილის მიმართ სანქციების დაწესება განიხილონ.

კიდევ რა ვიცით ევტუშენკოვზე: ის და ალი უზდანოვი, გავრცელებული ჩანაწერების კიდევ ერთი სავარაუდო ფიგურანტი, რუსეთში ერთ-ერთი ყველაზე მსხვილი საინვესტიციო ჰოლდინგის AFK სისტემას ხელმძღვანელები არიან.

• 1998-2006 წლებში ძალადობრივი ჯუგუფის ხელმძღვანელს, ლევან ვასაძე AFK სისტემას კომპანიის სტრატეგიისა და განვითარების ვიცე-პრეზიდენტის თანამდებობა ეჭირა.
• 2014 წელს, როცა ევტუშენკოვის წინააღმდეგ ფულის გათეთრების ბრალდებით საქმე იყო აღძრული, თავად პუტინმა განაცხადა, რომ მას ბრალი მოეხსნა.
• 2018 წლის სექტემბერში კი პუტინმა ევტუშენკოვს მადლობა გამოუცხადა "მიღწეული სამსახურებრივი წარმატებებისა და მრავალწლიანი კეთილსინდისიერი მუშაობისთვის".

დეტალები: პირველ სექტემბერს უკრაინის ანტიკორუფციულმა სასამართლომ ევტუშენკოვს ქონება ჩამოართვა — 17 უძრავი ქონების ობიექტი საერთო ფართობით თითქმის 100 000 კვადრატული მეტრი, ასევე, წილები რამდენიმე უკრაინულ კომპანიაში. კერძოდ:

• 42,09% — შპს ელექტროზავოდ-ვიტში;
• 59,2% — შპს ITM-Ukraine-ში;
• 59,2% — შპს Smart Digital Solutions-ში;
• 42.09% — ZTZ-Service-ში;
• 34,21% — სს უკრაინის კვლევითი დიზაინისა და ტრანსფორმატორების მშენებლობის ტექნოლოგიური ინსტიტუტში.

ეკონომიკის სამინისტრო წერს, რომ უმაღლესი ანტიკორუფციული სასამართლოს გადაწყვეტილებით, ევტუშენკოვისთვის ჩამორთმეულ ქონებას დღეიდან სახელმწიფო ქონების ფონდი განაგებს.

• "უკრაინის ბიუჯეტის შევსებასთან და რუსული აგრესიის შედეგად მიყენებული ზარალის ანაზღაურებასთან დაკავშირებული ამოცანების განხორციელებისთვის გამოვიყენებთ. ანუ ამ გზით უკრაინა ზარალს თავად აგრესორების ხარჯზე აანაზღაურებს", — აღნიშნა მინისტრმა.