ტარანე ალიდოსტი მას შემდეგ დააკავეს, რაც მან მოჰსენ შეკარის სიკვდილით დასჯა დაგმო.

რატომ არის მნიშვნელოვანი: მასშტაბური საპროტესტო აქციების დროს ირანში რამდენიმე ადამიანს სიკვდილით დასჯა მიესაჯა.

• საპროტესტო ტალღა 22 წლის მაჰსა ამინის გარდაცვალებამ გამოიწვია, მას შემდეგ, რაც იგი სახელმწიფოს მორალურმა პოლიციამ ჰიჯაბის არასწორად ტარების გამო დააკავა.

• Amnesty International-ის ცნობით, ნოემბრის მდგომარეობით, ირანის ხელისუფლება საპროტესტო გამოსვლებთან დაკავშირებით სულ მცირე 21 ადამიანის სიკვდილით დასჯას ითხოვდა.

• ოთხშაბათს, ნორვეგიაში დაფუძნებულმა ირანის ადამიანის უფლებათა დამცველმა ორგანიზაციამ განაცხადა, რომ სექტემბრიდან მოყოლებული, არეულობას სულ მცირე 458 ადამიანი ემსხვერპლა.

დეტალები: ალიდოსტის პროტესტის შესახებ "ტყუილის გავრცელებისთვის" წაუყენეს ბრალი.

• ალიდოსტი, რომელიც მონაწილეობდა სხვადასხვა პოპულარულ ირანულ სატელევიზიო შოუში, ცნობილია თავისი აქტიურობით მოძრაობაში MeToo.
• მსახიობი ღიად აკრიტიკებდა ირანის ხელისუფლებას პროტესტის ძალადობრივი გზებით ჩახშობის გამო.
• მან გასულ თვეს ინსტაგრამზე საკუთარი ფოტო გამოაქვეყნა, სადაც ისლამური ჰიჯაბის გარეშეა და ხელში უჭირავს აბრა წარწერით — "ქალები, სიცოცხლე, თავისუფლება".
• გასულ თვეში მან უარყო ინფორმაცია, რომ ირანი დატოვა და დაწერა, რომ აპირებდა ქვეყანაში დარჩენას.
• "მე დავდგები პატიმართა და დაღუპულთა ოჯახების გვერდით და მოვითხოვ სამართლიანობას. მე ვიბრძოლებ ჩემი სახლისთვის და ნებისმიერ ფასს გადავიხდი ჩემი უფლებების დასაცავად", — განაცხადა მან.

სიკვდილით დასჯა ირანში: შეკარის სიკვდილით დასჯის შემდეგ მსახიობმა განაცხადა, რომ ამ თემაზე დუმილი ნიშნავს "ტირანიის და ტირანების მხარდაჭერას".

• მან ასევე გააკრიტიკა საერთაშორისო ორგანიზაციები, — "ყოველი საერთაშორისო ორგანიზაცია, რომელიც უყურებს ამ სისხლისღვრას და არ მოქმედებს, არის კაცობრიობის სირცხვილი", — წერდა ალიდოსტი.
• ამ პოსტის შემდეგ მისი ინსტაგრამ ანგარიში წაიშალა.
• შეკარის ჩამოხრჩობიდან რამდენიმე დღის შემდეგ, მეორე სიკვდილით დასჯა 12 დეკემბერს მოხდა.
• მაჯიდრეზა რაჰნავარდი ჩრდილო-აღმოსავლეთის ქალაქ მაშჰადში მას შემდეგ ჩამოახრჩვეს , რაც ბრალი დასდეს ორი გასამხედროებული ოფიცრის მკვლელობაში.
• გარდა გახმაურებული შემთხვევებისა, არ არსებობს ოფიციალური მონაცემები, თუ რამდენი ადამიანი დასაჯეს სიკვდილით ირანში საპროტესტო გამოსვლების დროს.