ადგილობრივი და საერთაშორისო მედიების ინფორმაციით, რამდენიმეკვირიანი ყოყმანის და დიპლომატიური ზეწოლის შემდეგ, სახელისუფლებო გუნდის წარმომადგენლებმა გადაწყვეტილება გამოაცხადეს.

რა ხდება: უკრაინა უკვე დიდი ხანია ითხოვს თანამედროვე შეიარაღებას ოკუპანტებისთვის წინააღმდეგობის გასაწევად. მათ შორისაა, გერმანული წარმოების Leopard-2-ის ტანკები.

• რამშტეინის ბაზაზე მოკავშირეები ვერ შეთანხმდნენ კიევისთვის ამ ტანკების მიწოდებაზე.
• წყაროების მიხედვით, მთავარ დაბრკოლებად გერმანიის კანცლერის პოზიცია იქცა, რომელიც სიფრთხილეს იჩენდა.
• პოლონეთმა და ფინეთმა განაცხადეს, რომ მზად იყვნენ თავიანთი ლეოპარდები მიეცათ უკრაინისთვის, მაგრამ ამისთვის მწარმოებელი ქვეყნის თანხმობა იყო საჭირო — ბერლინს აქვს ვეტოს უფლება მისი ტანკების ექსპორტის ნებისმიერ გადაწყვეტილებაზე.
• გერმანიის საგარეო საქმეთა მინისტრმა განაცხადა, რომ მისი ქვეყნის მთავრობა არ ჩაერეოდა პოლონეთიდან ტანკების მიწოდების საკითხში.

რატომ არის მნიშვნელოვანი: ექსპერტები მიიჩნევენ, რომ ლეოპარდის ტანკები ყველაზე შესაფერისია უკრაინისთვის.

• ის დასავლეთის ერთ-ერთ საუკეთესო ტანკად ითვლება , იწონის 60 ტონაზე მეტს (60000 კილოგრამს), აქვს 120 მმ გლუვლულიანი იარაღი და შეუძლია სამიზნეების დარტყმა 5 კილომეტრამდე მანძილზე.
• მაგრამ არსებობდა შიშიც, რომ უკრაინისთვის ამ ტანკების მიწოდება რუსეთთან ურთიერთობას კიდევ უფრო გააუარესებდა და კონფლიქტის არეალის გაფართოებას გამოიწვევდა.
• ბოლო რამდენიმე დღე ყველა გერმანიის კანცლერის გადაწყვეტილების მოლოდინში იყო.

დეტალები: დღეს, 25 იანვარს მთავრობის სპიკერმა, შტეფენ ჰებესტრეიტმა განაცხადა, რომ საწყის ეტაპზე უკრაინას 14 Leopard 2A6 მიაწვდიან.

• Spiegel-ის ცნობით, გადაწყვეტილება გუშინ საღამოს მიიღეს და გადამწყვეტი მიზეზი გახდა ინფორმაცია, რომ ვაშინგტონი უკრაინისთვის M1 Abrams-ის ტანკების გადაცემას გეგმავს.
• "გადაწყვეტილება მიჰყვება ჩვენს ცნობილ ხაზს, რომ უკრაინას მაქსიმალურად ვუჭერთ მხარს. ჩვენ ვმოქმედებთ საერთაშორისო დონეზე მჭიდროდ კოორდინირებულად", — ნათქვამია კანცლერის, ოლაფ შოლცის განცხადებაში.
• გარდა ამისა, გერმანიის ფედერალური მთავრობა პარტნიორ ქვეყნებს მისცემს უფლებას, მიაწოდონ საკუთარი ლეოპარდები უკრაინას.
• როგორც AP-ის წერს, მიზანია გერმანიამ და მისმა მოკავშირეებმა უკრაინას სულ ორი ბატალიონი ანუ 88 ტანკი მიაწოდონ.
• CNN კი აღნიშნავს, რომ გერმანიაში მალევე დაიწყება უკრაინელი სამხედროების მომზადება — პაკეტი ასევე შეიცავს ლოჯისტიკასა და საბრძოლო მასალებს.