"პატრიარქის განცხადება კონსტიტუციურ მონარქიასთან დაკავშირებით, არის საკმაოდ საინტერესო და ვფიქრობთ, რომ ფართო საზოგადოებრივი ჩართულობით ამაზე მსჯელობა ძალიან დადებითი იქნება", - ამის შესახებ საქართველოს პრემიერმინისტრმა, გიორგი კვირიკაშვილმა, ჟურნალისტებს თემის კომენტირებისას განუცხადა.

პრემიერი მიიჩნევს, რომ ასეთი საკითხის გადაწყვეტა უნდა მოხდეს მხოლოდ და მხოლოდ ფართო საზოგადოებრივი კონსესუსით და ნაჩქარევი ნაბიჯები უმართებულოა.

გიორგი კვირიკაშვილმა ასევე აღნიშნა, რომ პატრიარქის განცხადება საკონსტიტუციო ცვლილებების პროცესთან კავშირში არაა.

„ჩვენ რა თქმა უნდა პატრიარქის უდიდესი პატივისცემა გაგვაჩნია და მინდა მას მადლობა გადავუხადო იმისთვის, რომ ძალიან ბევრს ფიქრობს ქვეყნის მომავალზე. რა თქმა უნდა, ეს საკითხი, როგორც პატრიარქმაც ბრძანა, არ არის არც დღეის და არც ხვალის. ამ საკითხის გადაწყვეტას შესაძლოა დასჭირდეს ათწლეული, უფრო მეტი ან - ნაკლები. ამაზე დღეს მსჯელობა არ არის".