რატომ არის მნიშვნელოვანი: Facebook-მა მთავრობის სტრატეგიული კომუნიკაციების დეპარტამენტთან დაკავშირებული 80 ყალბი ანგარიში, 26 გვერდი, 9 ჯგუფი და 2 Instagram ანგარიში კოორდინირებული არაავთენტური ქცევის გამო წაშალა.

• სოციალური ქსელის თანახმად, ყალბი ანგარიშების გამოყენებით პროსამთავრობო ნარატივის პოპულარიზებასა და ოპოზიციის დისკრედიტაციას ცდილობდნენ.
• ანგარიშში ვკითხულობთ, რომ ქსელი 24 საათის განმავლობაში ფუნქციონირებდა, რათა მთავრობის მხარდასაჭერი კონტენტი გაევრცელებინა, მათ შორის, ოფიციალური სამთავრობო გვერდებისა და პროსამთავრობო მედიების პოსტების გაზიარებით.
• ყალბი ანგარიშები დაკავებული იყო ოპოზიციის კრიტიკით, განსაკუთრებით, რუსული კანონის საწინააღმდეგო პროტესტის დროს.
• "მიუხედავად იმისა, რომ ამ ოპერაციის მიღმა მყოფი ადამიანები ცდილობდნენ, დაემალათ თავიანთი ვინაობა და კოორდინაცია, ჩვენმა გამოძიებამ იპოვა კავშირი მთავრობის სტრატეგიული კომუნიკაციების დეპარტამენტთან", — ვკითხულობთ ანგარიშში.

დეტალები: Facebook-ის მონაცემებით, ყალბი ანგარიშებიდან კონტენტის რეკლამირებაში, დაახლოებით, 33 500 დოლარი დაიხარჯა.

• მსგავსი ქსელი, საქართველოს გარდა, გამოვლინდა ვენესუელაში, ირანში, ჩინეთში, აშშ-ში, ბურკინა ფასოსა და ტოგოში.
• On.ge ცდილობს, დეტალებზე მთავრობის ადმინისტრაციას დაუკავშირდეს.

წარსულიდან: ეს პირველი შემთხვევა არ არის, როცა Facebook მმართველ გუნდთან დაკავშირებულ გვერდებს შლის.

• 2019 წლის დეკემბერში ფეისბუქმა თავისი ძირითადი პლატფორმიდან წაშალა, ჯამში, 396 გვერდი და ჯგუფი, რომლებიც შემჩნეულნი იყვნენ პროსახელისუფლებო და ანტიოპოზიციური პოსტების გავრცელებაში.
• გვერდები ქართულ ოცნებასთან იყვნენ დაკავშირებულები, თუმცა თავს პარტიებად, მედიებად, რეალურ პირებად და აქტივისტთა ჯგუფებად აჩვენებდნენ.
• 2020 წელს სოციალური ქსელის გიგანტმა წაშალა "ოცნებასთან" აფილირებულ კოკა ყანდიაშვილთან დაკავშირებული 511 გვერდი, 101 პერსონალური ანგარიში, 122 ჯგუფი და 56 ინსტაგრამ–ანგარიში, რომლებიც აქტივისტებისა და ოპოზიციური პარტიების დისკრედიტაციას ემსახურებოდნენ.
• ამავე წელს წაიშალა ნაციონალურ მოძრაობასთან დაკავშირებული 80 გვერდი, 23 ანგარიში და 41 ჯგუფი, ასევე, პატრიოტთა ალიანსთან დაკავშირებული ტროლების ქსელი.
• 2021 წელს ფეისბუქმა ქართულ მარშთან დაკავშირებული 24 გვერდი, 12 ჯგუფი და 34 ანგარიში წაშალა.
• 2022 წელს კი სოციალური ქსელიდან წაიშალა ძალადობრივ და პრორუსულ ალტ-ინფოსთან დაკავშირებული გვერდები და ჯგუფები წაშალა.