ალბათ ბევრს გვქონია მომენტი, როცა არასამუშაო საათებში ერთი ბანკიდან მეორეში თანხის გადარიცხვა გვინდა და ვიცით, მეორე დღემდე ლოდინი მოგვიწევს. კვირის ბოლოს ეს კიდევ უფრო დიდ საგონებელში გვაგდებს.

აღნიშნული დისკომფორტის შესახებ საქართველოს ბანკშიც იცოდნენ, ამიტომ გადაწყვიტეს, მომხმარებლებისთვის საქმის გამარტივებაზე ეზრუნათ.

"გადარიცხვების ფუნქციონალით საკმაოდ ბევრი მომხმარებელი სარგებლობდა და ვხედავდით, რომ არასამუშაო საათებში გადარიცხვებზე გვჭირდებოდა ახალი გადაწყვეტის მოფიქრება. ბევრი ვიფიქრეთ, როგორ გაგვემარტივებინა აღნიშნული პროცესი და შევთავაზეთ კიდეც მომხმარებლებს მომენტალური გადარიცხვები ბანკებს შორის, 24/7 ზე", — გვეუბნება მაიკო გორგილაძე, საქართველოს ბანკის ციფრული საბანკო მომსახურების დეპარტამენტის დირექტორის მოადგილე.

ტექნოლოგიურმა კომპანიამ, რომელიც მომხმარებლებზე მორგებული ინოვაციური პროდუქტებისა და სერვისების შექმნაზე ზრუნავს, საბანკო ოპერაციების კიდევ უფრო მოქნილი მოდელი შეიმუშავა. ამიერიდან, საქართველოს ბანკის მომხმარებლებს შეუძლიათ, ნებისმიერ დროს და ნებისმიერი ბანკიდან ჩარიცხონ თანხა სასურველ ანგარიშზე.

მაიკო გორგილაძე აღნიშნავს, რომ მომხმარებელი კომპანიის მთავარი მამოძრავებელი ძალაა, ამიტომ მუდმივი სიახლეებით კიდევ უფრო მეტი კომფორტის, სისწრაფისა და გამარტივებული ყოველდღიურობის შეთავაზებას ცდილობენ.

როგორ უნდა გადარიცხო თანხა?

მობილბანკის ინოვაციური ფუნქციონალით სხვასთან გადარიცხვის პროცესი ძალიან მარტივია:

  • ტრანზაქციას მობილბანკიდან ტელეფონის ნომრით განახორციელებ და იქვე მიუთითებ სასურველ თანხას;
  • ადრესატი ეგრევე, არასამუშაო საათებშიც მიიღებს SMS ბმულს, რომლითაც თანხას სასურველ ბარათზე დასვამს;
  • და თუ მიმღებს ბარათი ფავორიტებში აქვს მონიშნული, თანხა ავტომატურად ამ ბარათზე, ეგრევე დაჯდება.

გაითვალისწინე, ბმულით სარგებლობის ვადა 24 საათია.

თუ საკუთარ ანგარიშზე სხვა ბანკის ბარათიდან არასამუშაო საათებში თანხის გადარიცხვა მოგინდება, მარტივად მიყვები ამ ნაბიჯებს:

  • საქართველოს ბანკის მობილბანკში მიუთითებ გადმოსატანი თანხის ოდენობას;
  • პირველი შიდა გადარიცხვისას შეიყვან სასურველი ბარათის მონაცემებს;
  • მომდევნო გადარიცხვებისთვის ბარათს დაიმახსოვრებ და თანხას 1 დაჭერით გადმოიტან;
  • თანხა კი ეგრევე აგესახება საქართველოს ბანკის ანგარიშზე.

მაიკო გორგილაძე აღნიშნავს, რომ სიახლე მომხმარებლებისთვის კომფორტის შექმნის სურვილმა განაპირობა.

"ჩვენ მუდმივად ვცდილობთ, მომხმარებლებს მოვუსმინოთ და გავიგოთ, როგორ შეგვიძლია მათ კიდევ უფრო მეტი კომფორტი შევუქმნათ და დავუზოგოთ დრო, რაც ცხოვრების ამ აჩქარებულ ტემპში ძალიან მნიშვნელოვანია", — ამბობს მაიკო გორგილაძე.

მაიკო გორგილაძე იმასაც გვეუბნება, რომ წელს არაერთ საინტერესო პროექტზე მუშაობენ და მომხმარებლები მათთვის ხელსაყრელ სიახლეებს უნდა ელოდნენ.

"გვინდა, ჩვენს მომხმარებლებს, რომლებიც ყოველდღიურ ცხოვრებაში იყენებენ საქართველოს ბანკის აპლიკაციას, კიდევ უფრო მრავალფეროვანი პროდუქტები თუ სერვისები შევთავაზოთ. ჩვენი ყოველთვიური, მილიონ 200 ათასზე მეტი აქტიური მომხმარებელი გვაძლევს კიდევ უფრო მეტ მოტივაციას, არ გავჩერდეთ და განვვითარდეთ უწყვეტ რეჟიმში".