ამის შესახებ პრეზიდენტმა ბრიფინგზე განაცხადა.

რატომ არის მნიშვნელოვანი: ხელისუფლებისადმი კრიტიკულად განწყობილი მთავარი არხის დამფუძნებლისა და ჟურნალისტის, ნიკა გვარამიას წინააღმდეგ პროკურატურამ გამოძიება 2019 წლის 20 ივლისს დაიწყო.

• საქმე ეხებოდა ბრალდებას ტელეკომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების შესახებ.
• 2022 წლის 16 მაისს სასამართლომ გვარამიას 3 წლითა და 6 თვით პატიმრობა მიუსაჯა.
• 2023 წლის 2 ნოემბერს სააპელაციომ ის პატიმრობაში დატოვა, 19 ივნისს კი უზენაესმა დაუშვებლად ცნო გვარამიასა და კახაბერ დამენიას ადვოკატების საჩივარი.

კონტექსტი: ადგილობრივი ავტორიტეტული არასამთავრობო ორგანიზაციები აცხადებდნენ, რომ გვარამიას მიმართ გამოტანილი განაჩენი უკანონო და პოლიტიკურად მოტივირებულია.

• უზენაესის გადაწყვეტილების შემდეგ აშშ-ის საელჩომ განაცხადა, რომ შეშფოთებული არიან და მართლმსაჯულების შერჩევითად და პოლიტიზებულად აღქმაც კი რისკის ქვეშ აყენებს საქართველოს ევროპულ მომავალს და ძირს უთხრის მართლმსაჯულების უზენაესობას.
• პრეზიდენტს არაერთხელ მოუწოდეს, გვარამიას შეწყალებისკენ, თუმცა ის მუდმივად ხაზს უსვამდა, რომ დისკრეციულ უფლებამოსილებას საჭიროებისამებრ გამოიყენებს და არა ზეწოლით.
• ბრიფინგს წინ უძღოდა ევროკომისრის ზეპირი ანგარიში რეკომენდაციების შესრულების შესახებ, სადაც აღნიშნული იყო, რომ საქართველოს პლურალისტური მედიის თავისუფალი, პროფესიონალური და დამოუკიდებელი ფუნქციონირების პროცესში პროგრესისთვის არ მიუღწევია.

დეტალები: ზურაბიშვილმა დღევანდელ ბრიფინგზე განაცხადა, რომ ხელი მოაწერა შეწყალების აქტს და გადაწყვეტილება მას შემდეგ მიიღო, რაც ამოიწურა ყველა სამართლებრივი საფეხური, როცა სასამართლომ არ მიიღო განსახილველად საკასაციო სარჩელი.

• "ამ გადაწყვეტილებაზე მე არ ვაპირებ საუბარს, რომ რამე ახსნა-განმარტება გაგიზიაროთ. რამეთუ ეს არის ჩემი დისკრეციული უფლება, რომელსაც ვიყენებ დღეს. მინდა მხოლოდ ის გაგახსენოთ, რაც ასევე ევროპარლამენტში ვთქვი, ბრიუსელში, რომ ასეთი გადაწყვეტილება, პრეზიდენტის დისკრეციული უფლება არ ექვემდებარება ვინმეს ზეწოლას, რჩევას, რეკომენდაციას თუ სხვა ტიპის მუქარას, რომ ამას თუ არ იზამთ ის მოხდება, იმას თუ არ იზამთ, ეს მოხდება. ეს არის გადაწყვეტილება პრეზიდენტის", — განაცხადა პრეზიდენტმა.