ამის შესახებ ანგარიშს საერთაშორისო გამჭვირვალობა — საქართველო აქვეყნებს.

რატომ არის მნიშვნელოვანი: ბოლო პერიოდია, ადგილობრივი და საერთაშორისო ორგანიზაციები საქართველოში მედია გარემოს მნიშვნელოვან გაუარესებაზე საუბრობენ.

  • TI-ის შეფასებით, ბოლო წლებში გამოკვეთილი ტენდენციები თუ გამოწვევები აჩვენებს, რომ მიზანი კრიტიკული მედიის საქმიანობის შეზღუდვა და დისკრედიტაციაა.
  • მათივე თქმით, მედიის წარმომადგენელთა წინააღმდეგ განსაკუთრებით გახშირდა, ცილისწამების სარჩელები, რაც ხელისუფლებისთვის დამატებითი ბერკეტია არასასურველი მედიის შესაზღუდად.

განხილვის ვადები გაუმართლებლად ხანგრძლივია: ეს პირველი ტენდენციაა, რომელსაც გამჭვირვალობა — საქართველო მედიის წინააღმდეგ საქმეთა განხილვებში ხედავს.

  • "ეს იმ ფონზე, როცა პირველი ინსტანციის სასამართლოში მმართველი პარტიის თავმჯდომარის, ირაკლი კობახიძის დედის ცილისწამების სარჩელი TV პირველის წინააღმდეგ 6 თვეში დასრულდა. სასამართლომ განსაკუთრებით შემჭიდროებულად, 3 თვის ვადაში, განიხილა თბილისის მერის კახა კალაძის სარჩელი TV პირველის წამყვანის წინააღმდეგ. ორივე საქმეზე სასამართლომ გადაწყვეტილება მედიის წინააღმდეგ მიიღო", — აცხადებენ ორგანიზაციაში.
  • მათი შეფასებით, ასეთი განსაკუთრებული მიდგომა ხელისუფლების წარმომადგენლებისა და მათი ოჯახის წევრების მიმართ შერჩევითი სამართლის ნიშნებს შეიცავს.
  • "ჩვენ მიერ მედიის წარმომადგენლების უფლებების დასაცავად წარმოებულ დავებზე პირველი ინსტანციის სასამართლოში განხილვა არა თუ 6 თვემდე ვადაში სრულდება, არამედ რიგ შემთხვევებში საქმეზე ერთი პროცესიც კი არ ინიშნება", — ვკითხულობთ ანგარიშში.

საქმეთა განხილვა სასამართლო პრაქტიკის იგნორირებით: ორგანიზაციის შეფასებით, სასამართლო მედიებისა და ჟურნალისტების მონაწილეობით მიმდინარე საქმეების განხილვისას არ ხელმძღვანელობს კანონითა და უზენაესი სასამართლოს პრაქტიკით დადგენილი კრიტერიუმებით.

  • განსაკუთრებით შემაშფოთებელია, რომ სასამართლო მტკიცების ტვირთს მედიას აკისრებს, რაც მნიშვნელოვან გავლენას ახდენს საბოლოო გადაწყვეტილებაზე. მსგავსი ტენდენცია განსაკუთრებით თვალშისაცემია მედიის წარმომადგენელთა წინააღმდეგ შეტანილი ცილისწამების საქმეების განხილვისას".

მტკიცების ტვირთი მედიაზე: TI-ის განცხადებით, მტკიცების ტვირთის არასწორი განაწილების ტენდენცია გვხვდება შრომითსამართლებრივ დავებშიც.

  • "აღსანიშნავია, რომ შრომითსამართლებრივი დავები მტკიცების ტვირთის განაწილების თავისებურებით ხასიათდება, რასაც დამსაქმებლისა და დასაქმებულის არათანაბარი შესაძლებლობები განაპირობებს. დამსაქმებელს აქვს მტკიცებითი უპირატესობა სასამართლოს წარუდგინოს მტკიცებულებები და დაასაბუთოს გათავისუფლების შესახებ მიღებული გადაწყვეტილების კანონიერება".
  • ამის საპირისპიროდ, გამჭვირვალობა — საქართველოს მოჰყავს მაგალითები, როდესაც სასამართლომ შრომითი ხელშეკრულების შეწყვეტაზე მტკიცებულების წარდგენის ვალდებულება მოსარჩელე მხარეს დააკისრა, ამ გარემოებაზე დაყრდნობით კი ჟურნალისტის მოთხოვნები არ დააკმაყოფილა.