რატომ არის მნიშვნელოვანი: რამდენიმე დღის წინ ერთ-ერთი აბიტურიენტის ინტერესების დასაცავად PHR-მა გამოცდების ეროვნული ცენტრის წინააღმდეგ სასამართლოს მიმართა.

• ორგანიზაცია მოითხოვდა, რომ დამატებით გამოცდაზე დაეშვათ პირი, რომელიც ჯანმრთელობის მდგომარეობის გამო პირველ გამოცდაზე ვერ გამოცხადდა
• ბათუმელებთან ინტერვიუში დედამ განმარტა, რომ აბიტურიენტს გამოცდის წინა დღეს კბილი ასტკივდა და დასჭირდა ოპერაციული ჩარევა, ჰქონდა მაღალი ტემპერატურაც და ამის გამო ვერ მივიდა საგამოცდო ცენტრში.
• 27 ივლისს ორგანიზაციამ განაცხადა, რომ თბილისის საქალაქო სასამართლომ დააკმაყოფილა მათი ადვოკატების მოთხოვნა და გამოცდების ეროვნულ ცენტრს (naec.ge-ის) დაავალა აბიტურიენტი დამატებით გამოცდაზე დაეშვა.

დეტალები: PHR-ში გუშინ განაცხადეს, რომ 2 აგვისტოს, NAEC-მა სასამართლო გადაწყვეტილების აღსრულებაზე უარი განაცხადა, არგუმენტად კი ის დაასახელა, რომ ისტორიის დამატებითი გამოცდა 25 ივლისს ჩაატარა.

• ადვოკატები მიიჩნევენ, რომ ეს ფაქტი არ ათავისუფლებს ცენტრს სასამართლო გადაწყვეტილების შესრულებისგან.
• აბიტურიენტის დედამ, ინგა ბაშაროვმა პროტესტის ნიშნად შიმშილობა გამოაცხადა — ამბობს, რომ იშიმშილებს მანამ, სანამ naec.ge-ის დირექტორი არ დატოვებს თანამდებობას.
• PHR-ის წარმომადგენლის, ანა არგანაშვილის შეფასებით, "ეს არის არა ერთი აბიტურიენტის ან ერთი გადაწყვეტილების აღუსრულებლობა, არამედ ქვეყანაში კანონის უზენაესობაზე დარტყმა".
• ორგანიზაცია მოუწოდებს naec.ge-ს, დაიცვას აბიტურიენტის განათლებისა და საქმის სამართლიანი წარმოების უფლება და აღასრულოს სასამართლოს გადაწყვეტილება.
• მიმდინარე პროცესებს გამოეხმაურა გამოცდების ეროვნული ცენტრიც და განაცხადა, რომ სასამართლო განჩინება გაასაჩივრეს.
• "შეუძლებელია აბიტურიენტის დაშვება იმ გამოცდაზე, რომელიც უკვე ჩატარებულია", — აღნიშნულია უწყების განცხადებაში.

უკვე დღეს PHR-ში განაცხადეს, რომ სსიპ შეფასებისა და გამოცდების ცენტრის წინააღმდეგ შსს-ს გამოძიების დაწყების თხოვნით მიმართეს.

• როგორც ანა არგანაშვილი წერს, უახლოეს საათებში იძულებითი აღსრულების მოთხოვნით მიმართავენ აღსრულების ეროვნულ ბიუროსაც.
• "შეუძლებელია იმის დაშვება, რომ ამ ქვეყანაში, ადამიანმა გაიფიქროს "რა აზრი აქვს სასამართლოსთვის მიმართვას, თუ მის გადაწყვეტილებებს, სახელმწიფო ორგანო არ შეასრულებს". თუ ამას დავუშვებთ, მაშინ პროფესია უნდა დავტოვოთ და ამას ჯერ არ ვაპირებთ ადამიანის უფლებების ადვოკატები", — წერს ის.