რატომ არის მნიშვნელოვანი: 19 სექტემბერს აზერბაიჯანმა მთიან ყარაბაღი მძიმე არტილერიით დაბომბა.

• ბაქო ამტკიცებდა, რომ მათი სამიზნე არ არის სამოქალაქო დასახლებები ან ინფრასტრუქტურა და მხოლოდ სომხეთის შეიარაღებული ძალების სამხედრო ობიექტებს ესვრიან.
• თუმცა ყარაბაღის ოფიციალური პირების განცხადებით, დაიბომბა საცხოვრებელი სახლები, რასაც მსხვერპლი მოჰყვა.
• 20 სექტემბერს აზერბაიჯანმა განაცხადა, რომ მთიანი ყარაბაღი დანებდა.
• ადგილობრივმა მთავრობამ კი თქვა, რომ დათანხმდა რუსეთის სამშვიდობო კონტინგენტის ცეცხლის შეწყვეტის წინადადებას და შეიარაღებული ძალების დაშლასა და განიარაღებას.
• "აზერბაიჯანული მხარის მიერ წამოჭრილი საკითხები რეინტეგრაციის, მთიანი ყარაბაღის სომხების უფლებებისა და უსაფრთხოების უზრუნველყოფის, აგრეთვე აზერბაიჯანის კონსტიტუციის ფარგლებში მთიანი ყარაბაღის მოსახლეობის საარსებო წყაროს უზრუნველყოფის შესახებ, მიღწეული შეთანხმების მიხედვით, განიხილება ადგილობრივი სომეხი მოსახლეობისა და აზერბაიჯანის რესპუბლიკის ცენტრალური ხელისუფლების წარმომადგენლების შეხვედრაზე, რომელიც გაიმართება ქალაქ ევლახში 2023 წლის 21 სექტემბერს", — განაცხადეს ყარაბაღის ოფიციალურმა პირებმა.

რა ხდება ახლა: სომხური მედია CivilNet წერს, რომ ცეცხლის შეწყვეტის შეთანხმების მიუხედავად, ყარაბაღში სროლები გრძელდება.

• "მაშინ, როცა ელვახში მოლაპარაკებები მიმდინარეობს, აზერბაიჯანის არმია სტეფანაკერტს გარეუბნიდან ესვრის", — ნათქვამია CivilNet-ის გავრცელებულ ინფორმაციაში.

მთიანი ყარაბაღის ომბუდსმენის ოფისის ინფორმაციით, საბრძოლო მოქმედებების შედეგად დაიღუპა სულ მცირე 200 ადამიანი და დაშავდა 400-ზე მეტი.

• დაღუპულთა შორის არის 10 მშვიდობიანი მოქალაქე და 5 ბავშვი.
• მათი ცნობით, გრძელდება დაკარგულთა შესახებ ინფორმაციის მოპოვება.
• აზერბაიჯანის მხრიდან თავდასხმის შედეგად დაიღუპა ქალაქ მარტუნის მერი, აზნავურ საღიანიც.
• Meydan TV-ის მიერ გავრცელებული ინფორმაციით, დაღუპულია 80 აზერბაიჯანელი სამხედრო.

დეტალები: სროლების შედეგად დაიღუპა რამდენიმე რუსი სამხედროც. ამასთან დაკავშირებით აზერბაიჯანის პრეზიდენტს, ილჰამ ალიევს რუსეთის პრეზიდენტთან, ვლადიმერ პუტინთან სატელეფონო საუბარი ჰქონდა.

• ალიევმა პუტინს "ბოდიში მოუხადა და ღრმა მწუხარება გამოთქვა 20 სექტემბერს, ყარაბაღში, რუსი სამშვიდობოების ტრაგიკული დაღუპვის გამო".
• ასევე აღნიშნა, რომ ამ შემთხვევაზე საფუძვლიანი გამოძიება დაიწყება და "ყველა დამნაშავე შესაბამისად დაისჯება".
• მისივე თქმით, მზად არის დაღუპულთა ოჯახებს ფინანსურად დაეხმაროს.