რა ხდება: საქართველოს სტატისტიკის ეროვნულმა სამსახურმა გამოაქვეყნა 2023 წლის III კვარტლის ანგარიში, დასაქმებულთა საშუალო თვიური ნომინალური ხელფასის შესახებ.

  • მონაცემები აჩვენებს უთანასწორობას ქალებისა და მამაკაცების ხელფასებს შორის.

მონაცემების მიხედვით, 2023 წლის მესამე კვარტალში, ქალების საშუალო ხელფასი 774.8 ლარით ნაკლებია კაცების ანაზღაურებასთან შედარებით.

  • ამასთან, კაცების მაჩვენებლები ქალებზე მაღალია ხელფასის წლიური ზრდის პარამეტრითაც.

დეტალები: 2023 წლის III კვარტალში (ივლისი, აგვისტო, სექტემბერი)

  • ქალების საშუალო ხელფასი 1 459.1 ლარი იყო;
  • კაცების — 2 233.9 ლარით განისაზღვრა.
  • ხელფასების წლიურმა ზრდამ ქალებში 193.5 ლარი (15.3%) შეადგინა, ხოლო კაცებში — 329.1 ლარი (17.3%).
  • "საქმიანობის სახეების მიხედვით, კაცების ხელფასი ყველა სექტორში აღემატებოდა ქალების ხელფასს", — წერია საქსტატის მიერ მომზადებულ დოკუმენტში.

სტატისტიკის ეროვნული სამსახურის მიერ გამოქვეყნებული დიაგრამა, მონაცემებში აჩვენებს გენდერულ სახელფასო სხვაობას 2018-23 წლებში:

საშუალო თვიური ხელფასი სქესის მიხედვით 2018-2023 წლების კვარტლური მაჩვენებლები

საშუალო თვიური ხელფასი სქესის მიხედვით 2018-2023 წლების კვარტლური მაჩვენებლები

ფოტო: საქართველოს სტატისტიკის ეროვნული სამსახური

ქვემოთ მოცემულ დიაგრამაზე წარმოდგენილია დაქირავებით დასაქმებულთა საშუალო თვიური ხელფასი სქესობრივ ჭრილში, 2018-2023 წლებში, კვარტალების მიხედვით.

რას ნიშნავს გენდერული სახელფასო სხვაობა?

  • ეს არის კაცისა და ქალის საშუალო ხელფასებს შორის სხვაობის თანაფარდობა კაცის საშუალო ხელფასთან.
  • საქართველოში, წლების განმავლობაში, მნიშვნელოვან პრობლემას წარმოადგენს ქალისა და მამაკაცის ხელფასებს შორის მნიშვნელოვანი სხვაობა.

საქართველოს რატიფიცირებული აქვს შრომის საერთაშორისო ორგანიზაციის ფუნდამენტური კონვენცია #100 "მამაკაცთა და ქალთა თანაბარი ღირებულების შრომის თანაბარი ანაზღაურების შესახებ", რომელიც ავალდებულებს სახელმწიფოს, უზრუნველყოს თანაბარი ღირებულების შრომის თანაბარი ანაზღაურება ყოველგვარი დისკრიმინაციის გარეშე.

2018 წელს შრომის საერთაშორისო ორგანიზაციის (შსო) სტანდარტების კომიტეტმა, 2018-2019 წლებში კი ექსპერტთა კომიტეტმა განიხილა საქართველოს საკითხი იმ 25 სახელმწიფოს შორის, სადაც ყველაზე უხეშად ირღვევა შსო-ს სტანდარტები სწორედ მამაკაცის და ქალის ხელფასებს შორის საგანგაშო სხვაობის გამო.

ბოლო ხაზი: საქსტატმა გენდერული სახელფასო სხვაობის მაჩვენებლის გამოქვეყნება 2022 წლიდან დაიწყო.