მოკლედ: ოთხშაბათს, 3 იანვარს, ყველაზე დაბალი ტემპერატურა დაფიქსირდა ჩრდილოეთ ევროპის ქვეყნებში, ბალტიისპირეთსა და რუსეთში. უამინდობამ ორი ადამიანის სიცოცხლე იმსხვერპლა, საჭირო გახდა ასობით ადამიანის ევაკუაცია.

რა ვითარება იყო გუშინ ევროპაში

სკანდინავიის რეგიონში ტემპერატურა -40 გრადუსამდე დაეცა, უკიდურესმა სიცივემ და ქარბუქმა შეაფერხა ტრანსპორტირება, დაიკეტა რამდენიმე ხიდი და დაიხურა სკოლები.

• დანიაში პოლიციამ მოსახლეობას მოუწოდა, თავი აერიდებინათ მოტოციკლით გადაადგილებისგან, რადგან ქვეყნის ჩრდილოეთი და დასავლეთი მხარეში ძლიერი თოვა და ქარი იყო.
• შვედეთის საინფორმაციო სააგენტო იტყობინება, რომ გუშინ შვედეთის ლაპლანდიაში, ბოლო 25 წლის განმავლობაში, იანვრის თვეში ყველაზე დაბალი ტემპერატურა, -43.6 გრადუსი დაფიქსირდა.

ქარიშხალმა, რომელსაც ბრიტანეთის, ირლანდიისა და ნიდერლანდების ოფიციალურმა მეტეოროლოგიურმა სამსახურებმა ჰენკი უწოდა, გამოიწვია ელექტროენერგიის გათიშვა, ტრანსპორტის პრობლემები, ქონების დაზიანება დიდ ბრიტანეთში.

• ინგლისის დასავლეთში, მანქანას ხე დაეცა, რამაც მძღოლის სიცოცხლე იმსხვერპლა. გლოსტერშირის პოლიციამ განაცხადა, რომ მამაკაცი სამშაბათს ნაშუადღევს ქალაქ კემბლთან მომხდარი ინციდენტის დროს დაიღუპა.

• ოთხშაბათს ინგლისსა და უელსში 300-ზე მეტი წყალდიდობის შესახებ გავრცელდა გაფრთხილება, ხოლო 10 000 სახლი ელექტროენერგიის გარეშე დარჩა.

• ყველაზე ძლიერი ქარიშხალი დიდ ბრიტანეთში დაფიქსირდა, კუნძულ უაიტზე, სამხრეთ ინგლისის სანაპიროზე, სადაც ქარის სიჩქარემ საათში 151 კილომეტრს მიაღწია.

ნიდერლანდებში, ქალაქ ეინდჰოვენის მახლობლად, პოლიციამ განაცხადა, რომ ძლიერი ქარის გამო, 75 წლის მამაკაცი ველოსიპედიდან გადმოვარდა და გარდაიცვალა.

ბალტიისპირა ქვეყნებში — ლიეტუვაში, ლატვიასა და ესტონეთში ტემპერატურა ასევე მკვეთრად დაეცა.

საფრანგეთში, ჩრდილოეთ პას-დე-კალესა და სხვა რეგიონებში, ძლიერი წვიმის გამო დაახლოებით 200 ადამიანია ევაკუაცია მოხდა, ხოლო 10 000 ოჯახი ელექტროენერგიის გარეშე დარჩა. ასობით სასწრაფო დახმარების თანამშრომელი წმენდდა გზებს, დატბორილი სახლებიდან გამოჰყავდათ ხალხი.

• საფრანგეთს, პერსონალით და საჭირო აღჭურვილობით ამარაგებდა ჩეხეთი, სლოვაკეთი და ნიდერლანდები.

ტემპერატურა დაეცა რუსეთშიც — მოსკოვში, სანკტ-პეტერბურგსა და სხვა ქალაქებში -30 გრადუსი დაფიქსირდა.