რა ხდება: დღეს, 2024 წლის 13 იანვარს, საქართველოს პარლამენტის წინ იმართება აქცია.

• აქცია ორგანიზებულია ძალადობრივი, პრორუსული, ჰომოფიბიური კონსერვატორული მოძრაობის მიერ.
• ასევე, პრორუსული პარტიის, პატრიოტთა ალიანსის მიერ. შეკრებილებს მათმა ლიდერმა, ირმა ინაშვილმა მიმართა. ის ამბობს, რომ ხატი მატრონა მოსკოველისა და სტალინის გამოსახულებით, "ქართული ხატია."
• პრორუსული კონსერვატიული პარტიის დაქვემდებარებაში არსებულ კრემის პროპაგანდისტულ ქართულ ტელეარხზე, ალტ-ინფოზე, კვლავ ისმის ძალადობრივი მოწოდებები, მათ შორის, სასულიერო პირების.
• ისინი მოითხოვენ სახელმწიფოსგან, "მკრეხელობისთვის" დასაჯოს აქტივისტი, რომელმაც სამებაში გამოსახულ სტალინის ხატს საღებავი შეასხა.

დეტალები: ძალადობრივი ძალების მიერ ორგანიზებულ შეკრებაზე ისმის მოწოდება აქტივისტის, ნატა ფერაძის პასუხისგების თაობაზე — სისხლის სამართლის კოდექსის 155-ე მუხლის მიხედვით, რაც 2-წლამდე პატიმრობასაც გულისხმობს.

რას გულისხმობს: სისხლის სამართლის კოდექსის 155-ე მუხლი რელიგიური წესის აღსრულებისათვის უკანონოდ ხელის შეშლას შეეხება. კონკრეტულად,

1. ღვთისმსახურების ან სხვა რელიგიური წესისა თუ ჩვეულების აღსრულებისათვის უკანონოდ ხელის შეშლა, ჩადენილი ძალადობით ან ძალადობის მუქარით, ანდა თუ მას ახლდა მორწმუნის ან ღვთისმსახურის რელიგიური გრძნობის შეურაცხყოფა, — ისჯება ჯარიმით ან გამასწორებელი სამუშაოთი ვადით ერთ წლამდე ან შინაპატიმრობით ვადით ექვსი თვიდან ერთ წლამდე ანდა თავისუფლების აღკვეთით ვადით ორ წლამდე.

2. იგივე ქმედება, ჩადენილი სამსახურებრივი მდგომარეობის გამოყენებით, — ისჯება ჯარიმით ან შინაპატიმრობით ვადით ერთიდან ორ წლამდე ანდა თავისუფლების აღკვეთით ვადით ერთიდან ხუთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ

• რუსული პროპაგანტისტული ალტ-ინფოს ეთერში სასულიერო პირები, კონსერვატიული მოძრაობის ლიდერები და მხარდამჭერები აქტივისტს მოიხსენიებენ შეურაცხმყოფელი, დამამცირებელი ლექსიკით.
• ისმის მუქარა ნატა ფერაძის მიმართ, რომ "თუ სახელმწიფო არ მიხედავს, თავად მიხედავენ."

საპოლიციო ძალები აქციაზე: აქციაზე მობილიზებულია სამართალდამცავებისა და სასწრაფო დახმარების შემადგენლობა.

• საგულისხმოა, რომ პოლიციის წარმომადგენლები იმყოფებიან როგორც პარლამენტის შენობის მიმდებარე ტერიტორიაზე, ასევე, უშუალოდ შენობის წინ.

ბოლო ხაზი: On.ge-ს შსს-ში არ უპასუხეს, რატომ გადაწყვიტეს სამართალდამცავთა უშუალოდ შენობის წინ განლაგება.

ამ თემაზე: ნატა ფერაძე ამბობს, რომ უსაფრთხოების მიზნით, სახლი დატოვა