მოკლედ: პრემიერ-მინისტრმა, ირაკლი ღარიბაშვილმა მთავრობის დღევანდელ სხდომაზე განაცხადა, რომ რესპუბლიკური საავადმყოფოს დემონტაჟი და მის ბაზაზე ახალი საავადმყოფოს მშენებლობა იგეგმება. დამატებით დეტალებზე ჯანდაცვის მინისტრმა, ზურაბ აზარაშვილმაც ისაუბრა. მისი თქმით, ახალი საავადმყოფოს ასაშენებლად "საერთაშორისო დონის ტენდერი გამოცხადდება".

დეტალები: პროექტის ბიუჯეტი, დაახლოებით, 200 მილიონი ლარი იქნება.

• სამუშაოები 36-დან 48 თვემდე გაგრძელდება.
  
• მინისტრი საუბრობს იმის შესახებაც, რომ რესპუბლიკურის თანამშრომლებთან მთავრობას კონკრეტული შეთავაზებები ექნება.
• შეთავაზებებს შორისაა, 12 თვის კომპენსაციის გადახდა ერთიანად, დასაქმება, მინიმუმ, იმავე პოზიციაზე სხვა კლინიკაში და ამ შემთხვევაშიც, 4-თვიანი კომპენსაციის გადახდა.

როგორი იქნება ახალი საავადმყოფო — მთავრობის დაპირება:

• კლინიკა 500-ზე მეტ საწოლზე იქნება გათვლილი.
• მოეწყობა ამბულატორია და 100-ზე მეტ საწოლზე გათვლილი დღის სტაციონარი.
• კლინიკაში განთავსდება ბავშვთა ონკო-ჰემატოლოგიური ცენტრი.
• გაიხსნება თანამედროვე სტანდარტების ცენტრალური სისხლის ბანკი.
• საავადმყოფოს ტერიტორიაზე მოეწყობა აფთიაქები, სასწავლო სივრცეები, სამედიცინო ბიბლიოთეკა, ტელემედიცინის სივრცეები და სხვა.
• ღარიბაშვილი, ასევე, აღნიშნავს, რომ სრულიად იქნება დაცული კლინიკაში დასაქმებული სამედიცინო პერსონალის უფლებები.

კონტექსტი: ეს არ არის პირველი შემთხვევა, როცა მთავრობა რესპუბლიკური საავადმყოფოს რეაბილიტაციაზე საუბრობს. ჯერ კიდევ 2023 წლის მარტში ითქვა, რომ რესპუბლიკური საავადმყოფო დაინგრეოდა, მისი შემდგომი რეაბილიტაციის მიზნით.

• ამას, 2023 წლის მარტში, რესპუბლიკურის თანამშრომლების მოთხოვნა მოჰყვა, არ შეცვლილიყო კლინიკის ადგილმდებარეობა: "გვინდა შეგახსენოთ, რომ რესპუბლიკური საავადმყოფო ყოველთვის იყო და არის ქვეყნის წინაშე მდგარი გამოწვევების მიმღები მნიშვნელოვანი სტრატეგიული ცენტრი. ამის დასტურია 9 აპრილი, თბილისის სამოქალაქო, აფხაზეთის და აგვისტოს ომები. მარტო ის გარემოება რად ღირს, რომ კოვიდ პანდემიის დროს კლინიკამ ფორსმაჟორულ რეჟიმში გაატარა 20 000 პაციენტი", — აცხადებდნენ კლინიკაში.
• ასევე, თანამშრომლები ამბობდნენ, რომ ჯანდაცვის მინისტრმა შენობის ნგრევის შესახებ გადაწყვეტილება მათთვის სრულიად მოულოდნელად, ახალი მდებარეობისა და კონცეფციის გაურკვევლად დააანონსა და ეს დროში საეჭვოდ დაემთხვა მედპერსონალის დისკრედიტაციის მცდელობას.