შაბათს, 17 თებერვალს, 17:00 საათზე, უზნაძის 82 ნომერში, დიზაინის ინსტიტუტის გახსნის ღონისძიება გაიმართება.

დიზაინის ინსტიტუტი შემოქმედებითობაზე და დიზაინზე ფოკუსირებული, რეგიონული საგანმანათლებლო კვლევითი ინსტიტუციაა სტუდენტებისთვის და პროფესიონალებისთვის. დიზაინის ინსტიტუტის მისიაა, ბევრ ადამიანს გაუზიაროს დიზაინის ცოდნა და შემოქმედებითი უნარები, ასწავლოს, როგორ მოაგვაროს ნებისმიერი პრობლემა საკუთარი შემოქმედებითი რესურსით და სწორი დიზაინით.

დიზაინის ინსტიტუტმა სტუდენტების მიღება თებერვლიდან დაიწყო, სტუდენტებს და პროფესიონალებს უკვე აქვთ შესაძლებლობა ისწავლონ მცირეხნიან და ხანგრძლივ კურსებზე, ვორქშოპებსა და მასტერკლასებზე. სწავლის მიმართულებები დიზაინის სრულ სპექტრს მოიცავს: ჩანახატიდან პროტოტიპის შექმნამდე, დიზაინის ისტორიიდან დიზაინ პროგრამებამდე, კონცეფციების შექმნიდან დაკაბადონებამდე. დიზაინის ინსტიტუტი ასწავლის ხელოვნებას, სტრუქტურულ აზროვნებას, სტრატეგიულ დიზაინს, გრაფიკას, ყველა სახის მოძრავ ანიმაციას, ფერს, კრაფტს, დიზაინის ისტორიას, ვირტუალურ რეალობას და ნებისმიერ მიმართულებას, რაც დიზაინს მოიცავს.

ინსტიტუტმა თავი მოუყარა დიზაინის სფეროში მომუშავე 100-მდე ქართველ და უცხოელ სპეციალისტს — პროფესიონალებს, რომლებიც ქმნიან შემოქმედებითი ინდუსტრიის კულტურას. სფეროს საუკეთესო წარმომადგენლები გაუზიარებენ თავის თეორიულ და პრაქტიკულ ცოდნას ახალ თაობას და ფართო აუდიტორიას.

დიზაინის ინსტიტუტის მთავარი ფოკუსი სოციალური პროექტები იქნება. “ჩვენ გვჯერა, რომ განათლება ხელმისაწვდომი უნდა იყოს ყველასთვის. შესაბამისად, გამოვაცხადებთ სასტიპენდიო და ფინანსური დახმარების პროგრამებს ნიჭიერი ახალგაზრდებისთვის, მივცემთ საშუალებას სტუდენტებს დასაქმდნენ და მიიღონ მონაწილეობა პრაქტიკულ სამუშაოებში, ვითანამშრომლებთ კერძო და საჯარო სექტორთან სტუდენტების სტაჟირების და დასაქმების კუთხით”, - ამბობს დიზაინის ინსტიტუტის დამფუძნებელი, ნინო ეგაძე.

დიზაინის ინსტიტუტი ძველ თბილისში, მე-19 საუკუნის ისტორიულ შენობის ხუთ სართულზეა განლაგებული. აკადემიური საქმიანობის გარდა, ინსტიტუტის შიდა და გარე სივრცეები შეკრების ადგილი იქნება სხვადასხვა საგანმანათლებლო და კულტურული ღონისძიებებისთვის, შეხვედრებისთვის. ინსტიტუტში გაიხსნება წიგნის მაღაზია თემატური წიგნებით და საგამოფენო სივრცები.

ინსტიტუტს ჰყავს მრჩეველთა და სამეთვალყურეო საბჭო, რომელიც ეხმარება გუნდს საგანმანათლებლო და შემოქმედებითი პროცესების სწორად წარმართვაში და გრძელვადიანი მიზნების მიღწევაში. საბჭოს წევრები არიან: ნიკა ქურდიანი, გიორგი შარვაშიძე, გიორგი ხარაბაძე, ირაკლი ბაიდაშვილი, დავით ლორთქიფანიძე და გიორგი ბოხუა.

დიზაინ ინსტიტუტის პარტნიორები არიან ქართველი და საერთაშორისო კერძო და საჯარო ინსტიტუციები, სახელოვნებო ფესტივალები, მუზეუმები, მედია ორგანიზაციები, გამომცემლობები.

მისამართი: დ.უზნაძის ქ. #82, თბილისი
https://designinstitute.ge/
Contact@di.ge