რა ხდება: 26 თებერვალს, ღიად ანტიდასავლური ხალხის ძალის სახელით, საპარლამენტო უმრავლესობის დეპუტატების მიერ გამოქვეყნებულ განცხადებასთან დაკავშირებით, საქართველოში ამერიკის შეერთებული შტატების ელჩმა, რობინ დანიგანმა, მედიასთან კომენტარი გააკეთა.

• მან განაცხადა, რომ გაკვირვებულია იმ ყურადღებით, რაც აშშ-ის სახელმწიფო დეპარტამენტის შიდა მემორანდუმს საქართველოში დაეთმო.

კონტექსტი: 2024 წლის 26 თებერვალს ხალხის ძალამ გაავრცელა აშშ-ის წინააღმდეგ მიმართული მორიგი წერილი, რომელიც ჰომოფობიური გზავნილებით არის დატვირთული.

• საპარლამენტო უმრავლესობის დეპუტატების მიერ გავრცელებულ ტექსტში საქართველოს სტრატეგიული პარტნიორი ამერიკის შეერთებული შტატები წარმოჩენილია, როგორც "ფსევდოლიბერალური იდეოლოგიის" გამავრცელებელი, რომლის დახმარებით "ლგბტ-პროპაგანდა საერთაშორისო მასშტაბით ძალას იკრებს და ახალ სიმაღლეებს იპყრობს."

რობინ დანიგანი: "გაკვირვებული ვარ იმ ყურადღებით, რომელიც აქ ამერიკის შეერთებული შტატების სახელმწიფო დეპარტამენტის შიდა მემორანდუმს დაეთმო, რადგან ეს არის შიდა მემორანდუმი აშშ-ის სახელმწიფო დეპარტამენტისთვის, რომელიც სახელმწიფო დეპარტამენტში მყოფ ადამიანებს ეხმარება, უფრო ინკლუზიურები იყვნენ სამუშაო ადგილზე და ამ თემაზე სასაუბრო გზები იპოვონ.

• მე ვიტყოდი, რომ ამას საქართველოსთან კავშირი არ აქვს. რაც შეეხება ენას, ქართულ ენასაც არ აქვს გენდერის აღმნიშვნელი ნაცვალსახელები, ვფიქრობ, ეს საინტერესოა. მე ამაყი დედა, ამაყი და, ამაყი ცოლი ვარ და ვფიქრობ, ყველამ ის ენა უნდა გამოვიყენოთ, რომელიც სხვების პატივისცემას გამოხატავს." (IPN-ის თარგმანი)

ფრაგმენტი ხალხის ძალის განცხადებიდან: "ყველაზე მძიმე ისაა, რომ ფსევდოლიბერალური პროპაგანდის მთავარ წყაროდ უმაღლესი საფეხურის ოფიციალური დასავლური სტრუქტურებია ქცეული. ამ ყველაფერში აშშ-ის სახელმწიფო მდივნის დემონსტრაციული ჩართვა უკვე ყველა კითხვის ნიშანს ხნის იმის შესახებ, თუ საიდან და ვის მიერ იმართება ეს პროცესები", — აცხადებენ საქართველოს პარლამენტის დეპუტატები უმრავლესობიდან და მაგალითად ასახელებენ ენტონი ბლინკენის ფრაზას გენდერულად ნეიტრალური ტერმინების შესახებ.

ხალხის ძალის გზავნილების გამეორება დაიწყო საქართველოს პარლამენტის თავმჯდომარემ, შალვა პაპუაშვილმა, როდესაც თქვა, რომ "თავისთავად, მოსალოდნელია, რომ ცოტა ხანში საქართველოშიც გამოჩნდებიან აქტივისტები, რომლებიც გვეტყვიან, რომ ქართლის დედას ქართლის დედა აღარ უნდა ერქვას, დედა ენას აღარ უნდა დაერქვას დედა ენა და დედამიწას – დედამიწა."

გაიგე მეტი: ხელისუფლების მორიგი კამპანია ჰომოფობიური რიტორიკით, ლევან აკინის ფილმი და ანა ხაზარაძის კომპანია — რა ხდება