მოკლედ: პირველადი ვერსიით, აფეთქება სავარაუდოდ, გაზის გაჟონვამ გამოიწვია დიდუბის რაიონში, სამტრედიის ქუჩა #2-ში.

• საცხოვრებელ კორპუსში, სადაც 93 ოჯახი ცხოვრობს, ძლიერი აფეთქება მოხდა 14 მარტს, გამთენიისას.

• აფეთქება საცხოვრებელი კორპუსის პირველ სართულზე მოხდა, კომერციულ ფართში, სადაც სუპერმარკეტის გახსნა იგეგმებოდა.

• აფეთქებამ ნგრევა გამოიწვია და დაზიანებულია ავტომობილებიც შენობის წინ.

• შემთხვევის შედეგად, სიცოცხლისთვის საშიში დაზიანებები არავის მიუღია.

• ადგილზე ისევ მუშაობენ ექსპერტ-კრიმინალისტები.

რას იკვლევს გამოძიება: On.ge-ს შინაგან საქმეთა სამინისტროდან განუცხადეს, რომ გამოძიება დაწყებულია 240 პრიმა მუხლით, რაც გულისხმობს ელექტრო ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას.

დეტალები: გამოძიება უსაფრთხოების წესების დარღვევაზე მიმდინარეობს, თუმცა "უშუალოდ კომერციულ ფართს გაზი არ მიეწოდებოდა", — უთხრა ტელეკომანია იმედს ირაკლი დეკანოიძემ, ის არის სწრაფი რეაგირების ცენტრის უფროსი.

• "აფეთქება გამოიწვია ბუნებრივი გაზის დაგროვებამ — ჩვენ, ამ ვერსიას, არც ვადასტურებთ და არც უარვყოფთ, იქიდან გამომდინარე, რომ ჯგუფებს, კორპუსის დაზიანების გამო, არ მიეცა საშუალება შესულიყვნენ და დაეთვალიერებინათ.
• თუმცა, ეს ვერსია მომდინარეობს იქიდან, რომ პირველ სართულზე მიმდინარეობდა სარემონტო სამუშაოები და შესაძლებელია, იქ ყოფილიყო რაიმე ინციდენტი გაზის დანადგარებთან, ან გაზის ქსელთან დაკავშირებული", — თქვა მან სატელევიზიო კომენტარში.

მედიასთან კომენტარი გააკეთა თბილისის სახანძრო-სამაშველო ძალების მთავარი სამმართველოს უფროსმა, ლევან მუსელიანმა და აფეთქების გამომწვევ მიზეზად დაასახელა ბუნებრივი აირის გაჟონვა.

რა ვიცით ოჯახების მდგომარეობაზე: თბილისის მერია ირწმუნება, რომ დაზარალებული მოსახლეობა შენობიდან დროულად გამოიყვანეს.

ოჯახების სასტუმროებში დაბინავება დიდუბის რაიონის გამგეობამ უზრუნველყო.

• თბილისის მერია: "კორპუსის მდგომარეობის შესწავლის შემდეგ, ცნობილი გახდება, ადგილობრივი მოსახლეობა საცხოვრებლად აღნიშნულ კორპუსს დაუბრუნდება, თუ კორპუსის გამაგრებამდე დროებით ქირით გადაიყვანენ."
• ვითარება შემთხვევის ადგილზე: აფეთქებიდან მალევე, ადგილზე მობილიზებულები არიან როგორც შსს-ს საგანგებო სიტუაციების მართვის სამსახურისა და შესაბამისი უწყებების თანამშრომლები, ასევე, თბილისის მერიისა და დიდუბის რაიონის გამგეობის წარმომადგენლები.