რა ხდება: ბელარუსის პრეზიდენტმა, ალექსანდრე ლუკაშენკომ თქვა, რომ ბელარუსს არ სურს ბრძოლა, მაგრამ ომისთვის ემზადება. ამის შესახებ მან ქალაქ გროდნოში ყოფნისას განაცხადა, იუწყება სახელმწიფო სააგენტო ბელტა.

• "არავის დაუჯეროთ, რომ ჩვენ ბრძოლა გვინდა. ჩვენ ვემზადებით ომისთვის, ამაზე გულწრფელად ვლაპარაკობ — თუ გინდა მშვიდობა, მოემზადე ომისთვის", — განაცხადა მან.

დეტალები: მისივე თქმით, ბელარუსში მიმდინარეობს შესაბამისი ქვედანაყოფების წვრთნა, ჯარებს კი სხვადასხვა ტიპის იარაღი და აღჭურვილობა მიეწოდება.

• "თუ ვინმე იქიდან [არამეგობრული ქვეყნებიდან] ყვირის და გვაკრიტიკებს, იცოდეთ, რომ სწორად ვიქცევით. თუ იქ დაიწყებენ ჩვენს ქებას, ეს კატასტროფაა", — თქვა ქვეყნის პრეზიდენტმა და დასძინა, რომ არავის ემუქრება: "არავისთვის დამუქრება არ გვჭირდება. ჩვენ არ გვინდა სხვისი მიწა. ღმერთმა ქნას, რომ რაც გვაქვს, ეს დავამუშაოთ".

ფართო სურათში: ევროპარლამენტი ალექსანდრე ლუკაშენკოს ადანაშაულებს რუსული ჯარებისთვის საბრძოლო მასალისა და აღჭურვილობის მიწოდებასა და უკრაინელი ბავშვების იძულებით დეპორტაციაში.

• რუსეთი და ბელარუსი 2023 წელს შეთანხმდნენ, რომ რუსული ტაქტიკური ბირთვული იარაღი განთავსდება ბელარუსის ტერიტორიაზე.
• 2023 წლის ბოლოს კი, ლუკაშენკომ განაცხადა, რომ რუსული ბირთვული იარაღი ბელარუსში უკვე განთავსდა.
• რუსეთის მიერ, უკრაინაში დაწყებული სრულმასშტაბიანი ომის შემდეგ, ალექსანდრე ლუკაშენკომ თქვა, რომ ბელარუსის ხელისუფლება მზად არის, ბელარუსის ტერიტორიაზე უზრუნველყოს რუსეთი, უკრაინაში ახალი შეტევისთვის.
• მან ასევე განაცხადა, რომ მზად იყო ომში წასულიყო, თუ უკრაინა ბელარუსს თავს დაესხმებოდა.

"მე მზად ვარ, კვლავ უზრუნველვყო რუსეთი ბელარუსის ტერიტორიით [უკრაინაზე] შეტევისთვის. მე, ასევე მზად ვარ, ვიბრძოლო რუსებთან ერთად ბელარუსის ტერიტორიიდან, მაგრამ მხოლოდ იმ შემთხვევაში, თუ უკრაინიდან ერთი ჯარისკაცი მაინც შემოვა ჩვენთან, ჩემი ხალხის მოსაკლავად", — თქვა მან 2023 წლის თებერვალში.

ლუკაშენკომ მაშინაც თქვა, რომ ბელარუსი ემზადება ომისთვის, "რათა უზრუნველვყოთ, რომ ჩვენს წინააღმდეგ აგრესია არ განხორციელდეს."

• ამ განცხადებების ფონზე, უკრაინამ ბელარუსთან საზღვარი გააძლიერა.
• უკრაინის შეიარაღებული ძალების გენერალურმა შტაბმა არაერთხელ განაცხადა, რომ ბელარუსთან ბრძოლას არ აპირებს.