მოკლედ: საქმეზე საქართველო რუსეთის წინააღმდეგ, ადამიანის უფლებათა ევროპულმა სასამართლომ, ბორდერიზაციის შედეგა, რამდენიმე მუხლის დარღვევა დაადგინა.

• ინფორმაცია სასამართლოს ვებგვერდზე განთავსდა.

დეტალები: პრესრელიზში წერია, რომ 2008 წლის ომის შემდეგ ბორდერიზაციის პროცესი ომის "ერთ-ერთო ყველაზე მტკივნეულ მემკვიდრეობაა".

"საქართველოს მთავრობის ინფორმაციით, აფხაზეთში, ან სამხრეთ ოსეთში შესვლის, ან გასვლის მცდელობისას, ადამიანები მოკლეს, ხოლო ნაწილი დააკავეს, ან — არასათანადოდ მოეპყრნენ ადმინისტრაციული საზღვრის "არალეგალურად გადაკვეთისთვის“. ადამიანებს ჩამოერთვათ მიწა, რომელსაც იყენებდნენ მიწათმოქმედებისთვის, ოჯახები გაიყო, ბავშვებს აიძულებდნენ არჩევანის გაკეთებას რუსულ ენაზე სწავლას, ან — გრძელ და სახიფათო გზის გავლას შორის, საქართველოს მიერ კონტროლირებად ტერიტორიაზე სკოლაში მისასვლელად", — წერია განცხადებაში.

კონკრეტულად, სასამართლო ადგენს, რომ ადგილი ჰქონდა შემდეგი მუხლების დარღვევას:

• ევროკონვენციის მე-2 მუხლის (სიცოცხლის უფლება)
• მე-3 მუხლის (არაადამიანური ან დამამცირებელი მოპყრობის აკრძალვა)
• მე-5 მუხლის 1 პუნქტის (თავისუფლებისა და უსაფრთხოების უფლება)
• მე-8 მუხლის (პირადი და ოჯახური ცხოვრების პატივისცემის უფლება),
• კონვენციის პირველი ოქმის 1-ელი (საკუთრების უფლება) და მე-2 მუხლის (განათლების უფლება),
• მე-4 ოქმის მე-2 მუხლის (მიმოსვლის თავისუფლება) დარღვევას.

სასამართლომ დაადგინა, რომ გააჩნდა საკმარისი მტკიცებულებები, კერძოდ, მსხვერპლთა სიები, ჩვენებები, მედიის ანგარიშები და საერთაშორისო მასალები, რათა დაასკვნას, რომ სავარაუდო ინციდენტები არ იყო იზოლირებული და იყო საკმარისად მრავალრიცხოვანი და ერთმანეთთან დაკავშირებული იმისთვის, რომ წარმოადგენდეს დარღვევების სისტემას.

• "უფრო მეტიც, ინციდენტებზე ეფექტიანი გამოძიების აშკარა ნაკლებობა და ზომების ზოგადი გამოყენება ყველა დაინტერესებული პირის მიმართ ამტკიცებდა, რომ რუსეთის ხელისუფლება ოფიციალურად იყო ტოლერანტული მსგავსი პრაქტიკის მიმართ", — წერია პრესრელიზში.

ამავე დოკუმენტის თანახმად, სასამართლოში საქართველომ რუსეთის წინააღმდეგ კიდევ სამი საჩივარი შეიტანა. ასევე, სასამართლოში 200-მდე ინდივიდუალური საჩივარია განხილული საქართველოს, რუსეთის ან ორივე სახელმწიფოს წინააღმდეგ 2008 წლის შეიარაღებულ კონფლიქტთან, ან ბორდერიზაციის პროცესთან დაკავშირებით.

ბოლო ხაზი: განცხადება ადამიანის უფლებათა ევროპულ სასამართლოში 2018 წლის 22 აგვისტოს შევიდა.