მოკლედ: დემოკრატიის კვლევის ინსტიტუტი (DRI) აცხადებს, რომ რუსული კანონის საწინააღმდეგო აქციაზე ყველა დაკავებულის მიმართ ფიზიკურ ძალადობას ჰქონდა ადგილი.

დეტალები: DRI წერს, რომ სამართლებრივ დახმარებას უწევს დარბევის დროს უკანონოდ დაკავებულ 13 ადამიანს, რომელთაგან 12 სასტიკად ნაცემია:

• "მათ სხეულის მძიმე დაზიანებები, მათ შორის, ტვინის შერყევა, ყბის ტრავმული ართრიტი, ზედა და ქვედა კიდურების დაზიანება, სხეულის მრავლობითი დაჟეჟილობა, სილურჯეები, კოპები, ნახეთქი ჭრილობები".
• DRI წერს, რომ ორი დაკავებულის ჯანმრთელობის მდგომარეობა მძიმეა და ისინი ამ დრომდე კლინიკაში რჩებიან.

დემოკრატიის კვლევის ინსტიტუტის ინფორმაციით, შინაგან საქმეთა სამინისტროს სპეცრაზმის თანამშრომლების მხრიდან, "უკანონო და არალეგიტიმური ძალის გამოყენების დროს", დაკავებულებმა დაკარგეს ან დაუზიანდათ პირადი ნივთები.

• ასევე, დაზარალებულთა ჩვენებების მიხედვით, სპეციალური დანიშნულების რაზმის წევრების კანონით დადგენილი წესით იდენტიფიცირება შეუძლებელი იყო, რადგან ისინი არ ატარებდნენ სავალდებულო მაიდენტიფიცირებელ ნიშნებს.

DRI-ის შეფასებით: 16-17 აპრილს დაკავებულების მიმართ იკვეთება ადამიანის უფლებათა
დაცვის ევროპული კონვენციის მუხლების დარღვევა, ესენია:

• მე-3 მუხლი — წამების აკრძალვა;
• მე-5 — თავისუფლებისა და უსაფრთხოების უფლება;
• მე-10 — გამოხატვის თავისუფლება;
• და მე-11 მუხლი — შეკრებისა და გაერთიანების თავისუფლება.

ასევე, DRI წერს, რომ დაკავებული პირი არა უგვიანეს 24 საათისა, სასამართლოს უნდა წარედგინოს. თუმცა, მათი თქმით, ცნობილი გახდა, რომ არც ერთი დაკავებულის საქმეზე, შსს-ს არ წარუდგენია მტკიცებულება, რომლის მოპოვებაც შეუძლებელი იქნებოდა დაკავებიდან პირველი ოცდაოთხი საათის განმავლობაში:

• "დაკავების ვადის 48 საათამდე გახანგრძლივება ემსახურებოდა დემონსტრანტების დასჯას, მათთვის მიყენებული ძლიერი ფიზიკური ტკივილის გახანგრძლივებას ან/და მათი დაზიანებების საზოგადოებისთვის დამალვის მცდელობას".

DRI მოუწოდებს:

• შინაგან საქმეთა სამინისტროს: შეწყვიტოს შეკრების მონაწილეების უკანონო დაკავებები და უზრუნველყოს მათი უსაფრთხოება.
• თბილისის საქალაქო სასამართლოს: შეწყვიტოს მშვიდობიან დემონსტრანტთა მიმართ საქმის წარმოება და მიუთითოს მათი დაკავების უკანონობაზე.
• სპეციალურ საგამოძიებო სამსახურს: გამოიძიოს შსს-ს წარმომადგენელთა მიერ ჩადენილი ძალადობის და უფლებამოსილების გადამეტების ფაქტები.