მოკლედ: თბილისის ღიად ანტიდასავლურმა მერმა, კახა კალაძემ, დღეს, 3 მაისს კიდევ ერთხელ ისაუბრა მედიასთან რუსულ კანონზე, რომელსაც ხელისუფლება მოიხსენიებს, როგორც კანონპროექტს უცხოური გავლენის გამჭვირვალობის შესახებ.

• კალაძემ ისაუბრა სპორტსმენების, მათ შორის, ფეხბურთელების ნაწილის მოწოდებებზე და თქვა, რომ "ეს არის ქართული კანონი, რომელიც აუცილებლად იქნება მიღებული."

კალაძე: "მეც ვუერთდები მოწოდებას არა რუსულ კანონს.

• რა თქმა უნდა, რუსული კანონები საქართველოში არასდროს მიღებულა და არც არასდროს მიიღება.
• აღნიშნული გამჭვირვალობის კანონი კი, არის სუფთა ქართული კანონი, რომელიც ჩვენი ქვეყნის ინტერესებსა და ხვალინდელ დღეს იცავს. ეს კანონი აუცილებლად იქნება მიღებული."

კონტექსტი: "მრცხვენია და დარწმუნებული ვარ არა მხოლოდ მე, რომ შენს გვერდით ვითამაშე 10 წელი. არ მეგონა თუ ასეთ არარაობად, მოღალატედ და უსუსურ კაცად ჩამოყალიბდებოდი", — ასე მიმართა 1-ელ მაისს ფეისბუქიდან თბილისის მერს კახა ალადაშვილმა, ეროვნული საფეხბურთო ნაკრების ყოფილმა მცველმა. [მეტი]

• მას შემდეგ, რაც ხელისუფლებამ ისევ ძალის გამოყენებით დაშალა რუსული კანონის საწინააღმდეგოდ ქუჩაში გასული მშვიდობიანი დემონსტრანტები, რის შედეგადაც არაერთი ადამიანი დაზიანდა მათ შორის, სავარაუდოდ, რეზინის ტყვიების გამოყენებითაც, საქართველოს ეროვნული ნაკრების ფეხბურთელებმა განცხადებები გაავრცელეს, რომელშიც დაგმეს ძალადობა და ქვეყნის ანტიდასავლური კურსი.

• "ვერანაირად გამართლდება მშვიდობიან მომიტინგეებზე თავდასხმა", — დაწერა ბუდუ ზივზივაძემ გუშინ, 2 მაისს ფეისბუქზე [მეტი].

ბუდუ ზივზივაძის ამ განცხადების შემდეგ, სამთავრობო-პროპაგანდისტულმა მედიამ მისი კრიტიკა დაიწყო. საქართველოს პარლამენტის წევრმა და ყოფილმა ძიუდოისტმა შოთა ხაბარელმა კი წერილი გაავრცელა და "ბუდუ, შვილო", — მიმართა მას: "არ მგონია, შენ გინდოდეს ლომჯარიას დეკლარაციისთვის ეროვნულ და ამავდროულად, ევროპულ არჩევანს საფრთხე დაემუქროს. ამიტომ, სანამ რამეს დაწერ, ან ცოტა დაფიქრდი, ან შენ წინამორბედებს ჰკითხე ბოლო-ბოლო და აგიხსნიან, სინამდვილეში რა ბრძოლა მიდის ახლა."

• ზივზივაძის გარდა, პოზიცია სხვა ფეხბურთელებმაც გამოხატეს. "მიჭირს და რთულია ვუყურო, როგორ უპირისპირდებიან ჩემს თანამოქალაქეებს, განსაკუთრებით, ქალებს და ბავშვებს", — განაცხადა გიორგი ჩაკვეტაძემ, ფეხბურთელმა — "გაიწვიეთ ეს კანონი და კვლავ ისე ერთიანად გავაგრძელოთ ცხოვრება, როგორც 26 მარტს იყო! უარი რუსეთს, სრული სვლით ევროპისკენ!"