რა ხდება: საქართველოს პრეზიდენტმა, სალომე ზურაბიშვილმა 26 მაისის ღონისძიებაზე სიტყვით გამოსვლისას განაცხადა, რომ ის ხედავს პასუხისმგებლობას, იპოვოს საქართველოში შექმნილი სიტუაციიდან გამოსავალი.

• მან ჯარსა და საზოგადოებას გააცნო საკუთარი ხედვა.

დეტალები: მისი თქმით, გამოსავლის ქვაკუთხედი ევროპული გზის გადარჩენაა.

"ის, ვინც ამ გზას საბოტაჟს უწყობს და აზიანებს, ის ფეხქვეშ თელავს ჩვენი ქვეყნის მშვიდობიან და უსაფრთხო მომავალს, თავისუფალი და დემოკრატიული სამყაროს სრულყოფილ წევრად ქცევის გზას. ევროპული კავშირი არის თავისუფლების სივრცე, სადაც არცერთი ქვეყანა არ გაწევრიანებულა მისი და მისი ხალხის ნების გარეშე, ეს არის გზა ღიაობის, სამართლიანობისა და განვითარების. ეს არის ადგილი, სადაც დაცულია თუნდაც ყველაზე პატარა ერი, მისი ენა, სარწმუნოება, იდენტობა და ტრადიცია", — თქვა სალომე ზურაბიშვილმა

მისივე თქმით, ევროპაში არ არსებობს ომის პარტია და "რეალურად,
ომის პარტია მხოლოდ ერთია, რომელსაც ჩვენს ოკუპირებულ ტერიტორიებზე ვხედავთ — რუსული იმპერიალიზმი".

• "დღეს მაოცებს ის ფაქტი, რომ მიწევს ვიღაცები დავარწმუნო იმ ფაქტში, ვინაა მტერი და ვინაა მეგობარი; ხომ ვიცით ვინ წაგვართვა ტერიტორიები, ვინ დაარღვია ჩვენი ტერიტორიული მთლიანობა და ვინ იცავს ჩვენს სუვერენიტეტს და არაღიარების პოლიტიკას;
• ხომ ვიცით ვინ აკრძალა ქართული ენის სწავლა და ვინ აღიარა და დაიცვა ქართული ანბანი;
• ხომ ვიცით ვინ დაგვინგრია და ვინ აგვიშენა სკოლები;
• ხომ ვიცით ვინ გვიჭედავს ეკლესიის კარს და ვინ გვეხმარება ჩვენი ეკლესია-მონასტრების აღდგენასა და გადარჩენაში;
• ხომ ვიცით ვინ დაგვიწუნა და გამოდევნა ქართული ღვინო და ვინ დააფასა და აღიარა საქართველო ღვინის სამშობლოდ;
• ხომ ვიცით ვისი დახმარებით გახდა ჩვენი ჯარი თანამედროვე, საერთაშორისო სტანდარტებით აღჭურვილი;
• ვისი დახმარებით გაძლიერდა სოფლის მეურნეობა და კიდევ, ვინ მოთვლის და რა დათვლის, რა დაგვიშავა მტერმა და რა გაგვიკეთა მეგობარმა. ამიტომ არის, რომ ჩვენს კონსტიტუციაში ასახული საგარეო კურსი ჩვენი უალტერნატივო მომავალია",— თქვა პრეზიდენტმა.

მისი ხედვით, გამოსავლის მეორე ქვაკუთხედი — სტაბილურობაა.

• სალომე ზურაბიშვილი ამბობს, რომ რეგიონსა და გეოპოლიტიკურ ვითარებაში, მშვიდობიანი პროცესების გარდა, გამოსავალი არ არის.
• "არ არის და ვერ იქნება გამოსავალი რევოლუციების, სახელმწიფო გადატრიალების, დესტრუქციის, ანუ დესტაბილიზაციის გზა", — აცხადებს პრეზიდენტი და მშვიდობიანი სტაბილურობის შენარჩუნების ერთადერთ გზას მხოლოდ არჩევნებზე გავლით ხედავს.

"არჩევნები დემოკრატიულობის ერთადერთი გზა და ერთადერთი საზომია, არჩევნები დემოკრატიულობის მთავარი ტესტი, რითაც ასევე უნდა შეფასდეს ჩვენი მზადყოფნა ევროკავშირში გაწევრიანებისთვის. ამ არჩევნებით ჩვენ მთავარი არჩევანი უნდა გავაკეთოთ: ან ევროპული, დემოკრატიული, დამოუკიდებელი საქართველო, ან რუსული ყაიდის, ავტორიტარული და იზოლაციაში მყოფი საქართველო! ასეთ არჩევანს კი სახალხო რეფერენდუმი ჰქვია. სწორედ ამიტომ, მომავალი არჩევნები ამ ქვეყნისთვის იმავე მნიშვნელობის იქნება, როგორიც 1918 წლის არჩევნები, ან 1991 წლის რეფერენდუმი იყო - ანუ ქვეყნის ისტორიული გადაწყვეტილება! ხალხის ხმამ და ხალხის ნებამ ქართველი ერი ხელახლა უნდა დაბადოს და მას საკუთარი თავისა და შესაძლებლობების რწმენა დაუბრუნოს", — თქვა სალომე ზურაბიშვილმა.

• პრეზიდენტის ხედვით, გამოსავლის გზა არის, ასევე, საბჭოთა სისტემის გადმონაშთების ამოძირკვა, რასაც ზურაბიშვილი "განსაბჭოებას" უწოდებს.
• ამ სისტემის გადმონაშთები კი, მისი თქმით, არის იზოლაცია, ომი, არარსებული მტრის ხატი, კონსპირაციები და მათი თეორიები, დაპირისპირება, რეპრესიები, ცენზურა, მოსმენა, დასმენა, ფარული ჩანაწერები, კომპრომატების კორიანტელი, მონობა, ორგულობა, ტყუილი, გაუცხოება, შიში და კონფორმიზმი.

პრეზიდენტის განცხადებით, ქვეყანა უნდა გათავისუფლდეს ოკუპაციისგან და ამისი ერთადერთი მშვიდობიანი და რეალური გზა კვლავ ევროპის გზაა, რომელიც "არცერთ ფარულ გარიგებასა და ტყუილ დაპირებაზე არ გადის".

ასევე, სალომე ზურაბიშვილის თქმით,

• უნდა გათავისუფლდეს სასამართლო სისტემა;
• აუცილებელია ეკონომიკისა და ბიზნესის გათავისუფლება;
• მოქალაქეების გათავისუფლება სოციალური გარანტიებით;
• კულტურის თავისუფლება.

მან, ასევე, ხაზგასმით აღნიშნა, რომ არავინ უნდა ჩართოს "თავისუფალი სპორტსმენი პოლიტიკის მორევში". პრეზიდენტის განცხადებით, ტოტალიტარული რეჟიმის მახასიათებელია მიითვისოს სპორტსმენების გამარჯვებები, მიისაკუთროს მათი მედლები და წარმატებები და ეს ყველაფერი ვითომცდა მმართველი გუნდის დამსახურება იყოს.

• "ეს არის გზა გათავისუფლების, რომელიც უთუოდ გასავლელია. და ამ გზას ვერ გავივლით თუ არ შეეხება პოლიტიკურ სივრცეს: საბჭოთა გადმონაშთი სხვა რაა თუ არა ერთპარტიულობა, ერთი პარტიის მიერ ყველა სახელმწიფო ინსტიტუტისა და საჯარო სტრუქტურის მონოპოლია. საბჭოთა გადმონაშთია ბელადის და პარტიის ინტერესებზე სახელმწიფო ინტერესების დაქვემდებარება", — თქვა პრეზიდენტმა სიტყვით გამოსვლისას.

ბოლო ხაზი: თავისუფლების მოედანზე საზეიმო ღონისძიება დასრულდა.

• სალომე ზურაბიშვილის გარდა, საზოგადოებას და ჯარს დღეს სიტყვით მიმართეს საქართველოს პრემიერ-მინისტრმა, პარლამენტის თავმჯდომარემ და თავდაცვის მინისტრმა.
• მანამდე კი ახალწვეულებმა სამხედრო ფიცი დადეს.