რა ხდება: სოციალური სამართლიანობის ცენტრი (SJC) ეხმაურება თბილისის სახელმწიფო უნივერსიტეტის სტუდენტის, ნიკო მანაგაძის მიმართ, ფიზიკური ანგარიშსწორების შემდეგ, სატელეფონო ზარებით მუქარისა და სახლთან დახვედრით დაშინების ფაქტებს.

• SJC მოუწოდებს შინაგან საქმეთა სამინისტროს, დაუყოვნებლივ დაიწყოს გამოძიება.

დეტალები: SJC წერს, რომ 13 მაისს ნიკო მანაგაძის მიმართ ფიზიკური ძალადობის ფაქტზე, გამოძიების დაწყების მოთხოვნით, შინაგან საქმეთა სამინისტროს მიმართა.

შსს-ს განცხადებაზე რეაგირება ამ დრომდე არ ჰქონია.

• განცხადებას ერთვის ვიდეოჩანაწერი, რომელიც ნიკო მანაგაძეზე, შემთხვევის ადგილას მყოფი პირების, სავარაუდოდ, ქართული ოცნების პარტაქტივის მხრიდან ფიზიკური ანგარიშსწორების შემთხვევას ასახავს.
• ვიდეოჩანაწერით დგინდება ისიც, რომ ნიკო მანაგაძეს შეურაცხყოფა არ მიუყენებია კობახიძის თანმხლები პირებისთვის. მან პრემიერ-მინისტრს მიმართა შეკითხვით:
• "ბატონო, რუსეთის მონავ, შეგვხვდებით სტუდენტებს?", რის შემდეგაც შემთხვევის ადგილზე ვითარება დაიძაბა და 10 კაციანმა ჯგუფმა მიზანმიმართულად იძალადა ნიკო მანაგაძეზე.

SJC-ის ცნობით, ფიზიკური ანგარიშსწორების შემდეგ ნიკო მანაგაძეზე კვლავ გრძელდება მუქარა და დაშინების მცდელობები.

• 19 მაისს, მედიაში გავრცელდა ინფორმაცია მის სახლთან, სავარაუდოდ, მმართველი გუნდის მიერ ნიღბიანი პირების მობილიზების შესახებ.
• სავარაუდოა, რომ ჩასაფრებულმა პირებმა იცოდნენ, როდის აპირებდა ნიკო მანაგაძე სახლის დატოვებას, რადგან ის ერთ-ერთ გადაცემაში იყო მიწვეული.
• ასევე, მანაგაძის მობილური ტელეფონის ნომერსა და სოციალურ ქსელებში უცხო ნომრებიდან უწყვეტად შემოდის შეურაცხყოფისა და მუქარის შემცველი ზარები.
• "ბოლო პერიოდში სატელეფონო ზარების მასშტაბურობა ცალსახად მიუთითებს, რომ ის კოორდინირებული და კარგად დაგეგმილი დაშინების ოპერაციების ნაწილია", — წერს SJC.
• მათივე ცნობით, ამ საქმეზე ასამდე პირი უკვე დაიკითხა სასამართლოში.

ბოლო ხაზი: სოციალური სამართლიანობის ცენტრის თქმით, ყურადღება უნდა გამახვილდეს გამოძიების დაუყოვნებლივ დაწყების ვალდებულებაზე:

• "განცხადებით მიმართვის გარეშეც კი, მედია საშუალებებით გავრცელებული ინფორმაცია, აბსოლუტურად საკმარისი იყო დანაშაულის ნიშნების იდენტიფიცირებისა და გამოძიების საკუთარი ინიციატივით დაწყებისთვის".

გაიგე მეტი: "ჩემს სახეზე ეს კვალი გაქრება, მაგრამ შენი სახიდან რუსეთის მონის კვალი ვერ ჩამოირეცხება" — სტუდენტის მიმართვა პრემიერ-მინისტრს