გარდა იმისა, რომ Bolt Food დროული მიტანის სერვისია, მათი მიზანია მომხმარებლებს მიაწოდონ გემრიელი და ხარისხიანი პროდუქტი, სწორედ ამიტომ, რჩეული გემოების სერიის ფარგლებში, Bolt Food უფრო დიდ აუდიტორიას აცნობს რესტორნებს გამორჩეული კერძებითა და საინტერესო შექმნის ისტორიით.

დესერტების მოყვარულებმა კარგად იციან, თუ რამდენად რთულია ისეთი საკონდიტროს აღმოჩენა, რომელიც მომხმარებლებს განსხვავებულ გემოებს, თუმცა უცვლელ ხარისხს სთავაზობს. სწორედ ასეთია „განჯინას საკონდიტრო“, რომელმაც დონატებით, დარიჩინის ფუნთუშებით, განსხვავებული დიზაინის ტორტებითა და სხვა დესერტებით შეგვაყვარა თავი.

„განჯინას“ მიზნების მიღწევასა და წარმატებებში დიდ როლს ასრულებს ხელმისაწვდომობა. სოფოს თქმით, Bolt Food-თან თანამშრომლობით, მანძილი პრობლემას აღარ წარმოადგენს და უფრო მეტ ადამიანს აქვს შესაძლებლობა, “განჯინას” უგემრიელესი დესერტები დააგემოვნოს და შეიყვაროს.

როგორ გაჩნდა „განჯინას საკონდიტროს“ გახსნის იდეა, რა გზა გაიარა იდეიდან დესერტების მოყვარულთა გულებამდე და როგორია საკონდიტროს სამომავლო გეგმები – ამ თემებზე „განჯინას საკონდიტროს“ დამფუძნებელსა და კონდიტერს, სოფო ჩიქოვანს გავესაუბრეთ.

სოფო გვიყვება, რომ გახსნის დღიდან დღემდე განჯინამ უდიდესი გზა გაიარა. თავიდან მომხმარებლებს პასკებს სთავაზობდნენ, პანდემიის პერიოდში კი სოფომ ღუმელი იყიდა და ტკბილეულის სახლში ცხობა და პროდუქციის ონლაინ გაყიდვა დაიწყო. დარიჩინის ფუნთუშებმა და ორცხობილებმა მომხმარებლების მოწონება დაიმსახურა, რის შემდეგაც ე.წ. ბენტოს ტორტების იდეა გაჩნდა. ბენტოს ტორტების წყალობით, ბრენდი ძალიან პოპულარული გახდა და სოფომაც გადაწყვიტა, რომ კონდიტერიისთვის ხელი უფრო სერიოზულად მოეკიდა.

„თავიდან განჯინა იყო სახლის საკონდიტრო და ონლაინ მაღაზია, სადაც მხოლოდ დარიჩინის ფუნთუშები და ორცხობილები ცხვებოდა. შემდეგ გაჩნდა იდეა, რომ გაგვეკეთებინა ბენტოს ტორტები, რადგან მაშინ საქართველოში ამას არავინ ამზადებდა. ტორტების დახმარებით, ბრენდი ძალიან პოპულარული გახდა და მივხვდით, რომ უფრო პროფესიონალური მიდგომა იყო საჭირო. ამის გამო ბარსელონაში კონდიტერიის შესასწავლად გავემგზავრე, დავბრუნდი და ფალიაშვილის ქუჩაზე პირველი ფიზიკური სივრცე გავხსენით. როცა მივხვდით, რომ ‘განჯინას’ პროდუქციაზე მოთხოვნა გაიზარდა და სივრცე აღარ გვყოფნიდა, აბაშიძის ქუჩაზე უფრო დიდი ფართი ვიქირავეთ და ახლაც იქ ვიმყოფებით“, – იხსენებს სოფო.

თავისუფლება, ინოვაცია, ახალგაზრდული ხასიათი – ეს იმ ღირებულებების მცირე ჩამონათვალია, რომლითაც ბრენდი განსაკუთრებულად ამაყობს. აღსანიშნავია ისიც, რომ „განჯინაში“ შეზღუდვები არ არსებობს, რადგან აქ ყველას ინდივიდუალურად უდგებიან და ნებისმიერი მომხმარებლის ფანტაზიას უდიდესი გასაქანი აქვს.

„ჩვენ ვართ თავისუფალი, ახალგაზრდული, კონცეპტუალური ბრენდი. ვამსხვრევთ სტერეოტიპებს და არ ვერგებით გარკვეულ ჩარჩოებს, რომლებიც არსებობს საკონდიტრო სამყაროში საქართველოში. თითოეული შეკვეთისას მაქსიმალურად ვითვალისწინებთ ადამიანის ინდივიდუალურობას, მისი ხასიათის შტრიხებს და ამას ჩვენს პროდუქტში გამოვხატავთ“, – ამბობს სოფო.

სოფოს აზრით, ბაზარზე სიახლეების შემოტანა ბრენდისთვის განსაკუთრებულად მნიშვნელოვანია და სწორედ აქედან მოდის მისი სახელიც:

„განჯინა არის კარადა, სადაც ადრე ბებიები და ბაბუები ინახავდნენ მურაბებს, ჯემებსა და რეცეპტებს. ჩვენი კონცეფციაც იმას გულისხმობს, რომ ყოველდღიურად განჯინიდან ახალი რეცეპტი უნდა გამოვიღოთ და დავტესტოთ“.

„განჯინას“ გახსნის დღიდან სოფომ უამრავი გაკვეთილი ისწავლა, რომლებსაც საკონდიტრო სფეროში მოღვაწე ადამიანებსა და ახალგაზრდებს უზიარებს.

„ყველაზე მთავარი, რაც ვისწავლეთ, არის ის, რომ ნებისმიერი შეცდომის გამოსწორება შესაძლებელია, მთავარია, არ დანებდე და ხელი არ ჩაიქნიო, რადგან სირთულეები ყოველთვის იარსებებს. ამ სფეროში კომუნიკაცია ძალიან მნიშვნელოვანია. შესაძლოა, მომხმარებელთან შეცდომა დაუშვა, მაგრამ კარგი კომუნიკაციით შეცდომაც გამოასწორო და მომხმარებელი კიდევ უფრო კმაყოფილი დატოვო.

ახალგაზრდა ადამიანებს, რომლებიც სტარტაპის დაწყებაზე ფიქრობენ, მინდა ვუთხრა, რომ ყოველთვის აქვს აზრი შრომას და არდანებებას და ყველაფერი შეიძლება გამოგივიდეს, თუ მოინდომებ“, – ამბობს სოფო.

რაც შეეხება სამომავლო გეგმებს, სოფო და მისი გუნდი „განჯინას“ საქართველოსა და ევროპის მასშტაბით გაფართოებას გეგმავენ, რათა უფრო მეტმა ადამიანმა გაიცნოს საკონდიტრო, რომელიც თბილისში უკვე ბევრმა შეიყვარა.

რჩეული გემოების სერიის რესტორნებს Bolt Food-ის აპლიკაციაში შეხვდებით. გადმოწერეთ აპლიკაცია და დააგემოვნეთ ქალაქის განსაკუთრებული კერძები.