2024 წლის 27 ნოემბერს გამოქვეყნდა ცვლილება „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში. ცვლილება ეხება “გადახდის წყაროსთან დაკავებული გადასახადის დეკლარაციის“ (ე.წ. განაცემთა დეკლარაციის) ფორმას, რომელიც 2024 წლის დეკემბრის საანგარიშო თვიდან ამოქმედდება. მთავარი ცვლილება დეკლარაციის ფორმაში ეხება 2008 წლამდე დარიცხული განაცემების მიმდინარე პერიოდში გაცემისას შესავსები დეკლარაციის ველების გამარტივებას, ასევე განაცემთა დეკლარაციის “დანართი ა“-ში საგადასხადო შეღავათების ნაწილში საპენსიო შენატანის თანხის (2%-ის) ცალკე გამოყოფას, რაც მანამდე მოქმედ ფორმაში ცალკე გამოყოფილი არ იყო.

ახალი რედაქციით ჩამოყალიბდა “გადახდის წყაროსთან დაკავებული გადასახადის დეკლარაციის“ III ნაწილი “განაცემის დასახელება“. დეკლარაციის ახალი ფორმის შემოღებით გამარტივდა დეკლარაციის მთავარი გვერდი და ფორმიდან ამოღებული იქნა 2008 წლის 1 იანვრამდე დარიცხულ ანაზღაურებებთან დაკავშირებული რამოდენიმე უჯრა და გაცილებით გამარტივებული სახით ჩამოყალიბდა:

• 56¹ უჯრა — 2008 წლის პირველ იანვრამდე გაუცემელი ანაზღაურებებიდან, საანგარიშო პერიოდში გაცემული ანაზღაურება;
  
  
• 56² უჯრა — 2008 წლის პირველ იანვრამდე გაუცემელი ანაზღაურებებიდან საანგარიშო თვეში გაცემულ ანაზღაურებაზე გადახდის წყაროსთან დაკავებული გადასახადი (განაკვეთი12%);

გარდა ზემოთ აღნიშნულისა 2008 წლამდე დარიცხულ და მიმდინერე პერიოდში ანაზღაურებულ განაცემებთან (ასევე სოციალურ გადასახადთან) დაკავშირებული ქვემოთ მითითებული უჯრები სრულად იქნა ამოღებული დეკლრაციის ფორმიდან:

• 56³ უჯრა – საანგარიშო თვეში გაცემული 2008 წლის 1 იანვრამდე გაუცემელი ანაზღაურების ოდენობა, რომელზეც დარიცხულია სოციალური გადასახადი;
  
  
• 56⁴ უჯრა – სოციალური გადასახადი საანგარიშო თვეში გაცემულ ანაზღაურებაზე (563 უჯრაში ასახული თანხის შესაბამის საგადასახადო განაკვეთზე ნამრავლი);
  
  
• 56 ⁵ უჯრა – გადახდის წყაროსთან დაკავებული გადასახადი საანგარიშო თვეში გაცემულ ანაზღაურებაზე (563 უჯრაში ასახული თანხის შესაბამის საგადასახადო განაკვეთზე ნამრავლი);

გარდა ამისა ახალი რედაქციით ჩამოყალიბდა დეკლარაციის დანართი “ა“, კერძოდ განაცემების ველში ცალკე იქნა გამოყოფილი დაკავებული საპენსიო შენატანის თანხა (2%) როგორც საშემოსავლო გადასახადისგან გათავისუფლებული განაცემი, ასევე ცალკე გამოიყო სხვა განაცემები, გარდა ამისა ამოღებული იქნა სოციალურ გადასახადთან დაკავშირებული უჯრა, კერძოდ:

• საგადასახადო შეღავათების ველი გაიმიჯნა ორ ნაწილად და ახალი რედაქციის მიხედვით, ცალ-ცალკე შესაბამის ველებში უნდა აისახოს „დაგროვებითი პენსიის შესახებ“ საქართველოს კანონის შესაბამისად დასაქმებულის სახელითა და ხარჯით განხორციელებული საპენსიო შენატანთან დაკავშირებული შეღავათი და სხვა შეღავათები. შეგახსენებთ, რომ აღნიშნული დანართის ძველ რედაქციაში საპენსიო შენატანიც და სხვა შეღავათებიც აისახებოდა ჯამურად ერთ ველში “შეღავათის ოდენობა“.
  
  
• ამოღებულ იქნა “სოციალური გადასახადი“-ს ველი, ვინაიდან ეს გადასახადი უკვე დიდი ხანია გაუქმებულია.

დეკლარაციის დანართი “ა“

ცვლილების შესახებ დეტალური ინფორმაცია იხილეთ ბმულზე.

Kreston Georgia არის აუდიტორული და ბიზნეს საკონსულტაციო კომპანია, რომელიც 2010 წლიდან ოპერირებს საქართველოს ბაზარზე და წარმოადგენს საერთაშორისო აუდიტორული კომპანიების ქსელის, Kreston Global-ის წევრ აუდიტორულ კომპანიას საქართველოში. კომპანია მომხმარებლებს სთავაზობს აუდიტისა და ბიზნეს საკონსულტაციო მომსახურების ფართო სპექტრს. კრესტონის გლობალური ქსელი 115 ქვეყანაში, 830 ოფისით ყველა კონტინენტზეა წარმოდგენილი, აერთიანებს 27.000 თანამშრომელსა და 160 წევრ ფირმას.