ვლადიკავკაზელი ბიზნესმენის ოლეგ გუსოვის ოჯახმა, რომელიც, გავრცელებული ინფორმაციით, ჯერმუქის მინერალური წყლის დალევის შემდეგ გარდაიცვალა, სომეხი მწარმოებლის, მისი წარმომადგენლისა და დისტრიბუტორების წინააღმდეგ რუსეთში სარჩელი შეიტანა.

სარჩელის შესახებ ინფორმაცია კვირას გავრცელდა.

რუსული მედიასაშუალება კომერსანტი იტყობინება ამ საქმის შესახებ და წერს, რომ გუსოვმა 2024 წლის 11 თებერვალს ვლადიკავკაზში, "ფარნის" ბაზრობაზე მდებარე სადგომზე ჯერმუქის მინერალური წყლის შეფუთვის მქონე ბოთლი იყიდა.

ის ჯერ ვლადიკავკაზის საავადმყოფოში გადაიყვანეს, შემდეგ კი სასწრაფო დახმარების მანქანით მოსკოვში, სადაც "კოროზიული სითხით" (ძმარმჟავით) მოწამვლა დაუდგინეს და რამდენიმე დღის შემდეგ, 13 თებერვალს გარდაიცვალა.

კომერსანტის ცნობით, გუსოვის სიკვდილის მოწმეები ამტკიცებდნენ, რომ დაზარალებულს პირიდან ძლიერი ძმრის სუნი ამოსდიოდა, ამავდროულად, გუსოვის ქალიშვილმა განაცხადა, რომ ორი კვირის განმავლობაში ძმრის სუნი იდგა სახლსა და ეზოში იმ ადგილზე, სადაც ბოთლი მას შემდეგ გატყდა, რაც მამამისს დალევისთანავე ხელიდან გაუვარდა.

საქმეზე გამოძიება ჯერ დასრულებული არ არის და არაერთი მოთხოვნა გაიგზავნა სომხეთში, მაგრამ კომერსანტის ცნობით, რუსულ მხარეს "პასუხი არ მიუღია"

კომერსანტმა დაზარალებულ მხარესაც ციტირებს, რომლებიც ვარაუდობენ, რომ "ძმრის მჟავა შესაძლოა ბოთლში ტექნოლოგიური პროცესის დარღვევის შედეგად მოხვდა".

გუსოვის წარმომადგენლები ამ დასკვნამდე მინერალური წყლის ჩამოსასხმელ ქარხნებში გამოყენებული ტექნოლოგიების შესწავლის შემდეგ მივიდნენ. მათ გაარკვიეს, რომ ძმარმჟავას მინის ჭურჭლის გასარეცხად იყენებენ.

მომხდარი ინციდენტის შემდეგ, ჯერმუქის წყლები რუსეთში სანქცირებული იყო.

ორშაბათს სომხეთის ეკონომიკის სამინისტრომ "არსენპრესს" განუცხადა, რომ სომხეთმა რუსეთს "შესაბამისი მტკიცებულებები" წარუდგინა, რომ ჯერმუქის მინერალური წყალი "მოთხოვნებს აკმაყოფილებს"

ჯერმუქის წინააღმდეგ რუსეთის შეზღუდვები 2024 წლის მარტის ბოლოს საბოლოოდ გაუქმდა. სამთავრობო მედიასაშუალება TASS იტყობინება, რომ ვოლგოგრადის ოლქის ინსპექტორებმა 11 000-ზე მეტი მაღაზია შეამოწმეს, რომლებიც ჯერმუქის წყალს ყიდიან და აღმოაჩინეს, რომ ისინი ყველა უსაფრთხო იყო.

სომხეთის ეკონომიკის სამინისტრომ განაცხადა, რომ ჯერმუქის წინააღმდეგ შეზღუდვების მოხსნა "ადასტურებს, რომ სომხური მხარის მტკიცებულებები საკმარისი იყო".

ორშაბათს, თავის განცხადებაში ჯერმუქმა სარჩელს "სრულიად უსაფუძვლო" უწოდა და აღნიშნა, რომ მინერალურ წყალს ბიზნესმენის გარდაცვალებასთან არანაირი კავშირი არ ჰქონდა და ამ საკითხში კომპანიის ბრალეულობა უარყო.

ჯერმუკმა ასევე თქვა, რომ რუსული მედიასაშუალებების ინციდენტის აღწერა ცრუ ინფორმაციას შეიცავს, რომელიც ცილისმწამებლური იყო და უდანაშაულობის პრეზუმფციას არღვევს.

"ვინაიდან არც დაწყებული სისხლის სამართლის პროცესის ფარგლებში და არც განხორციელებული მრავალრიცხოვანი შემოწმების დროს (მათ შორის, რუსეთის ფედერაციის კომპეტენტური სახელმწიფო ორგანოების მიერ) არ დადასტურდა ოლეგ გუსოვის გარდაცვალება […] "ჯერმუქის" მინერალური წყლის შედეგი", — ნათქვამია კომპანიის განცხადებაში.

კომპანია ჯერმუქმა ასევე განაცხადა, რომ იგი არ იყო ჩართული რუსეთში გუსოვის გარდაცვალებასთან დაკავშირებით დაწყებულ სამართალწარმოებაში და რუსეთის ხელისუფლების მიერ ჩატარებულმა "ბევრმა ინსპექციამ" დაადასტურა, რომ ჯერმუქის მინერალური წყალი აკმაყოფილებს საერთაშორისო სტანდარტებით დადგენილ მოთხოვნებს და განკუთვნილია საკვებად გამოსაყენებლად.

გასულ წელს, ბიზნესმენის გარდაცვალების ცნობიდან მალევე, ჯერმუქმა განაცხადა, რომ მისი მინერალური წყალი არ შეიცავს ძმარს და "არ წვავს საყლაპავს".

სომხური კომპანიის წინააღმდეგ სარჩელის შესახებ ინფორმაცია მას შემდეგ გავრცელდა, რაც რუსეთ-სომხეთის ურთიერთობები კრიზისის ახალ რაუნდში შევიდა.

რუსეთს ადრე იმაში ადანაშაულებდნენ, რომ ჯანსაღი საკვების სტანდარტებს იყენებდა ისე, როგორც ქვეყნებზე ეკონომიკური ზეწოლის განხორციელების საშუალებას.

2024 წლის განმავლობაში, როდესაც რუსეთსა და სომხეთს შორის ურთიერთობები მკვეთრად შეიცვალა, იყო რამდენიმე შემთხვევა, როდესაც რუსეთი აცხადებდა, რომ სხვადასხვა სომხური პროდუქცია, მათ შორის სომხური კონიაკი, ვერ აკმაყოფილებდა რუსულ სტანდარტებს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.