რვა არასამთავრობო ორგანიზაცია მიიჩნევს, რომ საქართველოს ყოფილი გენერალური აუდიტორის ლაშა თორდიას საქმეზე ვიდეოჩანაწერის გავრცელებაში შესაძლოა შსს-ს უკანონო ქმედებები იკვეთებოდეს:

"2017 წლის 7 სექტემბერს გავრცელებული ინფორმაციით ყოფილი გენერალური აუდიტორის ლაშა თორდიას საქმეზე პერსონალურ მონაცემთა დაცვის ინსპექტორმა პ.ა.მ. კლუბი ადმინისტრაციულ სამართალდამრღვევად ცნო. ინსპექტორის მიერ შემოწმების შედეგად დადგინდა, რომ კომპანიამ კლუბში მომხდარი ინციდენტის ამსახველი ვიდეოჩანაწერები მესამე პირს გადასცა მხოლოდ ერთხელ. კერძოდ, 2016 წლის 27 დეკემბერს ვიდეოჩანაწერები გადაეცა საქართველოს შინაგან საქმეთა სამინისტროს, "პერსონალურ მონაცემთა დაცვის შესახებ" საქართველის კანონის დარღვევით."

მათი აზრით, პროკურატურამ უნდა დაიწყოს გამოძიება შსს-ს მიერ პ.ა.მ კლუბში მომხდარი ინციდენტის ამსახველი ვიდეოჩანაწერის უკანონოდ მოპოვებისა და გავრცელების შესაძლო ფაქტთან დაკავშირებით.

ისინი, ასევე, მოუწოდებენ შინაგან საქმეთა სამინისტროს, გაასაჯაროოს რა ეტაპზეა ლაშა თორდიაზე თავდასხმის და პ.ა.მ. კლუბში მომხდარი ინციდენტის საქმეებზე მიმდინარე გამოძიებები:

"ვიდეოჩანაწერის გავრცელებამ მაშინვე გააჩინა კითხვები იმასთან დაკავშირებით თუ როგორ მოხდა გამოძიების ხელთ არსებული ვიდეო მასალის გასაჯაროება. დამატებით ეჭვებს აჩენდა ოთარ ფარცხალაძის მიერ 14 მაისს გაკეთებული განცხადება, სადაც ის ლაშა თორდიას "შეუფერებელ" ქცევაზე მიუთითებდა. ფარცხალაძის განცხადებამ გააჩინა საფუძვლიანი ეჭვი, რომ მან წინასწარ იცოდა ვიდეო მასალის არსებობის შესახებ."

ხელმომწერი არასამთავრობო ორგანიზაციები:

• საერთაშორისო გამჭვირვალობა საქართველო
• სამართლიანი არჩევნებისა და დემოკრატიის საერთაშორისო საზოგადოება
• ფონდი ღია საზოგადოება საქართველო
• ადამიანის უფლებათა ცენტრი
• ინფორმაციის თავისუფლების განვითარების ინსტიტუტი
• საქართველოს დემოკრატიული ინიციატივა
• მედიის განვითარების ფონდი
• საქართველოს რეფორმების ასოციაცია

2017 წლის 12 მაისს მაშინ მოქმედ გენერალური აუდიტორს თავს დაესხნენ. ლაშა თორდიას განცხადებით, მას ყოფილი მთავარი პროკურორი ოთარ ფარცხალაძე, დაცვის წევრებთან ერთად, ფიზიკურად გაუსწორდა. მომხდართან დაკავშირებით შინაგან საქმეთა სამინისტრომ გამოძიება სისხლის სამართლის კოდექსის 126-ე მუხლით დაიწყო.

გენერალურ აუდიტორზე თავდასხმიდან რამდენიმე დღეში, სოციალური ქსელის მეშვეობით, გავრცელდა ლაშა თორდიას ვიდეომასალა, სადაც, სავარაუდოდ, 2016 წლის 24 დეკემბერს კაფე-ბარ პ.ა.მ კლუბში მომხდარი ინციდენტია ასახული. აღნიშნულ ფაქტზე გამოძიება მუქარის მუხლით მიმდინარეობს.