ტელეკომპანია პირველის ეთერით გავრცელებულ ინფორმაციას, რომლის მიხედვითაც, სახელმწიფო უსაფრთხოების სამსახური უკანონო მოსმენა-თვალთვალს აწარმოებდა და, სავარაუდოდ, სისტემურ ზეწოლასა და მუქარას ახორციელებდა კონკრეტულ სასულიერო პირზე, ერთ-ერთი ეპისკოპოსის სავარაუდო მკვლელობის გეგმასთან დაკავშირებით, დემოკრატიის კვლევის ცენტრი განცხადებით ეხმაურება.

"გავრცელებული ჩანაწერები შეიცავს სავარაუდო დანაშაულის ნიშნებს — როგორც უკანონო მოსმენების, ისე შესაძლო მუქარის, ზეწოლისა და სასულიერო პირის ლიკვიდაციის დაგეგმვის კუთხით. აღნიშნული მასალა უნდა გახდეს შესაბამისი სამართალდამცავი უწყებების დაუყოვნებელი ინტერესისა და რეაგირების საგანი", — ნათქვამია განცხადებაში.

დემოკრატიის კვლევის ცენტრის თქმით, უკანონო მოსმენების პრაქტიკა ახალი არ არის და მსგავსი ფაქტები უკვე დაფიქსირებულია.

"სახელმწიფო უსაფრთხოების სამსახურის მიერ უკანონო მოსმენების სავარაუდო პრაქტიკა სიახლეს არ წარმოადგენს. ჯერ კიდევ 2021 წლის 12 სექტემბერს TV პირველის ეთერში გასული სიუჟეტის მიხედვით, სახელმწიფო უსაფრთხოების სამსახური, სავარაუდოდ, ტოტალურ კონტროლს ახორციელებდა საჯარო მოხელეებზე - ადგილობრივ თვითმმართველობის ორგანოში დასაქმებულ პირებზე, სკოლისა და ბაღის პედაგოგებზე, პარტიის წევრებზე, საპატრიარქოს ადმინისტრაციის თანამშრომელსა და ყველა რანგის სასულიერო პირებზე. აღნიშნულ ფაქტზე პროკურატურამ ფორმალურად დაიწყო გამოძიება, თუმცა ამ დრომდე, საზოგადოებას არ აქვს ინფორმაცია საქმის მიმდინარეობის/შედეგის შესახებ",— წერია გავრცელებულ განცხადებაში.

DRI ასევე აღნიშნავს, რომ სუს-ის რესურსს ქართული ოცნება პარტიული ინტერესებისთვის იყენებს და ცდილობს ავტორიტარიზმის განმტკიცებას.

"განსაკუთრებით ბოლო პერიოდში თვალსაჩინოა, რომ უწყება არა ქვეყნის უსაფრთხოების, არამედ პარტიულ ინტერესებს ემსახურება. ქართული ოცნება, მათ შორის, უსაფრთხოების სამსახურის რესურსით ცდილობს ავტორიტარიზმის განმტკიცებას. სავარაუდო, ტოტალური მოსმენა/თვალთვალი კი აღნიშნულის ერთ-ერთი საშუალებაა, რაც ადამიანის იწვევს ფუნდამენტური უფლებების უგულებელყოფას.

სამსახურის საქმიანობაზე ეფექტიანი კონტროლი წარსულშიც უკიდურესად სუსტი იყო. დღესდღეობით კი, პოლიტიკური კრიზისიდან გამომდინარე, მასზე დემოკრატიული ზედამხედველობა შეუძლებელია. ქვეყნის უსაფრთხოების სამსახურის მხრიდან სავარაუდოდ უკანონოდ განხორციელებული ფარული მოსმენა/თვალთვალი განსაკუთრებით საფრთხის შემცველია მაშინ, როდესაც არ არსებობს არც ერთი დამოუკიდებელი ინსტიტუტი. საგამოძიებო უწყებებისა და სასამართლოს მიკერძოება კიდევ უფრო თვალსაჩინო ბოლო პერიოდში, მასშტაბური პროტესტისა და რეპრესიების ფონზე გახდა," — წერს დემოკრატიის კვლევის ცენტრი.