ხუთწლიანი ლოდინის შემდეგ, სამხრეთკორეული ჯგუფი BTS მსმენელებს ახალი მუსიკით უბრუნდება.

მას შემდეგ,რაც ჯგუფის წევრები — RM, შუგა, V, ჯიმინი, ჯანგკუკი, ჯინი, J-Hope — სამხედრო სამსახურში გაიწვიეს, გულშემატკივრები 2025 წლის ივნისამდე დღეებს ითვლიდნენ. როგორც იქნა, ლოდინი დასრულდა და ჯგუფის წევრებმა სულ ახლახან გაგვანდეს, რომ ისინი ძალიან მალე ახალი ალბომით დაბრუნდებიან.

"მომავალი წლის გაზაფხულზე BTS-ის ახალ ალბომს გამოვუშვებთ, ხოლო ივლისიდან შვიდივე ერთად დავიწყებთ ახალ მუსიკაზე მუშაობას", — ვკითხულობთ ჯგუფის საერთო განცხადებაში — "ახალ ალბომთან ერთად მსოფლიო ტურნესაც ვგეგმავთ და ვიმედოვნებთ, რომ თქვენც ისეთივე აჟიტირებული ხართ, როგორც ჩვენ".

შეგახსენებთ, რომ 2022 წლის მარტში BTS-მა ხანგრძლივი შესვენება გამოაცხადა, რამაც საშუალება მისცა ჯგუფის წევრებს სამხრეთ კორეაში სავალდებულო სამხედრო სამსახური მოეხადათ.

ჯინი პირველი იყო, ვინც 2022 წლის დეკემბერში გაიწვეს და პირველი, ვინც გასული წლის ივნისში დაითხოვეს. რამდენიმე თვის შემდეგ არმია დატოვა J-Hope-მაც, რომელმაც Rolling Stone-თან ინტერვიუში განაცხადა, რომ ჯარში ყოფნა მისთვის "ფასდაუდებელი გამოცდილება" იყო და მომავალზე დაფიქრების საშუალება მიეცა.

2025 წლის ივნისის დასაწყისში, RM-მა და V-მ სავალდებულო სამხედრო სამსახური მოიხადეს, რასაც მოჰყვა ჯანგკუკისა და ჯიმინის გათავისუფლება, ხოლო შუგა რამდენიმე დღეში დაითხოვეს.

"ჩვენ ყოველთვის მადლიერები ვართ თქვენი სიყვარულისა და მხარდაჭერისთვის", — განაცხადა ჯგუფის მხარდამჭერმა კომპანიამ —"ჩვენ ვაგრძელებთ მაქსიმალური ძალისხმევის დახარჯვას ჩვენი მუსიკოსების მხარდასაჭერად. კიდევ ერთხელ გიხდით მადლობას BTS-ისადმი თქვენი მუდმივი სიყვარულისა და მხარდაჭერისთვის".

განცხადებაში შუგამ გაიხსენა BTS-ისა და მათი გულშემატკივრებისგან შორს გატარებული დრო.

"ვფიქრობ, ბოლო ორი წლის განმავლობაში დიდი დრო დავუთმე საკუთარ თავზე ფიქრს", — თქვა მან — " აუცილებელი იყო, დროებით უკან დამეხია იმ საქმიანობისკენ, რომელსაც დიდი ხნის განმავლობაში ვაკეთებდი. ადრე მხოლოდ წინ მივიწევდი უკანმოუხედავად, მაგრამ ამჯერად მომეცა საშუალება, კიდევ ერთხელ მეფიქრა საკუთარ თავზე. მინდა მადლობა გადავუხადო ჩემს გულშემატკივრებს, ძალიან მენატრებოდით".

აქვე შეგახსენებთ, რომ სამხრეთ კორეაში 18-დან 28 წლამდე ასაკის ყველა შრომისუნარიანი მამაკაცი ვალდებულია, რომ გაწვევის ფარგლებში 18-დან 21 თვემდე სამხედრო სამსახური გაიაროს, რომელიც მიზნად ჩრდილოეთ კორეის მხრიდან აგრესიის შეკავებას ისახავს.