პოპულარულმა ამერიკულმა ჟურნალმა People, ტრადიციულად, წელსაც დაასახელა პლანეტის ყველაზე სექსუალური კაცი. ეს საპატიო ტიტული ამჯერად ინგლისელ მსახიობ ჯონათან ბეილის ერგო. 37 წლის ვარსკვლავი პირველი ღიად გეი კაცი გახდა, რომელმაც ეს წოდება დაიმსახურა.

"ეს ჩემთვის დიდი პატივია", — აღნიშნავს ბეილი, — "რასაკვირველია, ძალიან მეამაყება, მაგრამ სრულებით დაუჯერებელია. თან, ამ ამბავს საიდუმლოდ ვინახავდი და მიხარია, რომ ახლა ჩემი ოჯახის წევრები და მეგობრებიც გაიგებენ".

თუმცა, საიდუმლო მსახიობმა მაინც გაუმხილა თავის ძაღლს, ბენსონს, რომელთან ერთადაც იპოზიორა კიდეც ჟურნალის ფოტოსესიისთვის.

People ყველაზე სექსუალურ კაცს 1985 წლიდან ასახელებს. პირველად ეს ტიტული მელ გიბსონს ერგო. ბოლო წლებში წოდება დაიმსახურეს ჯონ კრასინსკიმ, პატრიკ დემპსიმ, ჯონ ლეჯენდმა, იდრის ელბამ, დუეინ ჯონსონმა და დევიდ ბექჰემმა. შერჩევის პროცესი საკმაოდ ხანგრძლივია, მაგრამ კონკრეტულ კრიტერიუმებს არ მიჰყვება — თანაც, შეფასების პროცესში მხოლოდ გარეგნობას როდი ექცევა ყურადღება. ჟურნალის ყოფილი რედაქტორის ცნობით, ისინი პოპკულტურის ტენდენციებს მიჰყვებიან და აკვირდებიან, თუ რომელი ვარსკვლავები განიხილებიან ყველაზე მეტად.

ამ თვალსაზრისით კი, ბეილის ნამდვილად წარმატებული წელი ჰქონდა. მსახიობი, რომელსაც საყოველთაო პოპულარობა ნეტფლიქსის სერიალმა ბრიჯერტონმა მოუტანა, წელს კინომიუზიკლ Wicked-სა და ზაფხულის ბლოკბასტერად ქცეულ Jurassic World Rebirth-ში გამოჩნდა.

"ძალიან გამიმართლა", — ასე პასუხობს მსახიობი შეკითხვას, როგორ აღწერდა საკუთარ ცხოვრებას ამ მომენტისთვის, — "ცხოვრება ყველასთვის მოგზაურობაა, მნიშვნელობა არ აქვს, ვინ ხარ და საიდან მოდიხარ. მთავარია, როცა მოგზაურობ, ორივე მხარეს გაიხედო და დარწმუნდე, რომ ყველა კარგად გრძნობს თავს. თუ საჭიროა, მათ გაშლილი ხელითაც უნდა მიეგებო".

წარმატებული კარიერის მიუხედავად, ბეილის წინათ არაერთხელ უსაუბრია, რამდენ წინაღობას აწყდება კინო და სატელევიზიო ინდუსტრიაში თავისი იდენტობის გამო. მსახიობი, რომელიც საჯაროდ 2018 წელს დაქამინგაუთდა, ჰყვება, რომ თავის იდენტობაზე ღიად საუბრისგან თავშეკავებისკენ, ძირითადად, ამ სფეროში მყოფი სხვა გეი კაცები მოუწოდებდნენ. ბეილის თქმით, აგენტები და ქასთინგ მენეჯერები ყოველთვის ყოყმანობდნენ, როცა საქმე "გეი როლებს" ეხებოდა.

"თითქოს რცხვენიათ, ეს განწყობა თვალშისაცემია", — აღნიშნავს იგი.