აშშ-ს პრეზიდენტმა დონალდ ტრამპმა განაცხადა, რომ აღარ აპირებს კონგრესის დარწმუნებას იმაში, რომ ირანთან გაფორმებული ბირთვული შეთანხმება ამერიკის ინტერესებს შეესაბამება.

2015 წელს ბარაკ ობამას ადმინისტრაციის მიერ ხელმოწერილი დოკუმენტის მიხედვით, აშშ-ის პრეზიდენტი ყოველ სამ თვეში ერთხელ ვალდებულია კონგრესს წარუდგინოს ანგარიში ბირთვული შეთანხმების შესახებ. პრეზიდენტმა უნდა დაარწმუნოს კონგრესი, რომ შეთანხმება დაცულია და ქვეყნის ინტერესებს არ აზიანებს, ასევე, უნდა ურჩიოს გააგრძელოს თუ არა სანქციების შეჩერება, რომელიც ირანის ბირთვული პროგრამის წინააღმდეგ იყო მიმართული.

თავის გამოსვლაში ტრამპმა ირანს "ფანატიკური რეჟიმი" უწოდა. მან განაცხადა, რომ დაიწყებს კონსულტაციებს საერთაშორისო პარტნიორებთან, რათა შეთანხმების პირობებს გადახედონ. შეთანხმების პარტნიორები არიან: დიდი ბრიტანეთი, საფრანგეთი, გერმანია, რუსეთი და ჩინეთი:

"ჩვენ არ გავაგრძელებთ იმ გზაზე სიარულს, რომელიც დასრულდება უფრო მეტი ძალადობით, მეტი ტერორით და რეალური საფრთხით ირანის ბირთვული იარაღის მისაღებად".

როგორც ტრამპი აცხადებს, თუ პარტნიორებთან და კონგრესთან შეთანხმებას ვერ მიაღწევს, ბირთვული შეთანხმება ირანთან "მომენტალურად" გაუქმდება.

დონალდ ტრამპის საპასუხოდ ირანის პრეზიდენტმა ჰასან რუჰანიმ განაცხადა, რომ აშშ-ის მთავარი მიზანია ირანის ეკონომიკური პროგრესის შეჩერება:

"საბოლოო ჯამში აშშ-ის უნდა, რომ ირანში არ შემოვიდნენ კერძო ინვესტორები და ქვეყანამ ეკონომიკურ პროგრესს ვერ მიაღწიო".

რა რეაქცია მოჰყვა ტრამპის გადაწყვეტილებას?

საფრანგეთმა, გერმანიამ და დიდმა ბრიტანეთმა საერთო განცხადებაში შეშფოთება გამოთქვეს ტრამპის გადაწყვეტილების გამო. მათ მოუწოდეს ამერიკის ადმინისტრაციასა და კონგრესს, რომ დაფიქრდნენ როგორ აისახება ეს აშშ-ის უსაფრთხოებასა და მის მოკავშირეებზე.

ევროპის კავშირის უმაღლესმა წარმომადგენელმა საგარეო საქმეთა და უშიშროების პოლიტიკის სფეროში, ფედერიკა მოგერინიმ განაცხადა, რომ ირანთან დადებული შეთანხმება სრულყოფილია და თეირანის მხრიდან შეთანხმების დარღვევას ადგილი არ ჰქონია.

რუსეთის საგარეო საქმეთა სამინისტროს თქმით, საერთაშორისო ურთიერთობებში აგრესიული და მუქარის შემცველი რიტორიკა დაუშვებელია და ტრამპის გადაწყვეტილება შეთანხმების სულისკვეთებას არ შეესაბამება.

აშშ-ის პრეზიდენტის გამოსვლას მხარი დაუჭირა ისრაელის პრემიერ-მინისტრმა, ბინიამინ ნეთანიაჰუმ. მისი თქმით, ტრამპი "ირანის ტერორისტული რეჟიმის წინააღმდეგ თამამად გამოვიდა".