ოცნების ხელისუფლების პარლამენტის თავმჯდომარემ, შალვა პაპუაშვილმა აშშ-ის საემიგრაციო ვიზების გაცემის გაჩერებაზე გააკეთა კომენტარი. მისი განმარტებით, საქართველოსთვის საემიგრაციო ვიზების დამუშავების შეჩერება აშშ-ის ადმინისტრაციის და შიდა საემიგრაციო პოლიტიკის გადასაწყვეტია და დასძინა, რომ მათი პრიორიტეტია "მოქალაქეები დარჩნენ საქართველოში და ქვეყნის განვითარებაში ჩაერთნონ".

"მათი გადასაწყევტია. უპირველეს ყოვლისა საუბარი არ არის ტურისტულ ვიზებზე — საუბარია საიმიგრაციო ვიზებზე. ეს არის ნებისმიერი ქვეყნის შიდა პოლიტიკური დღისწესრიგის ნაწილი, თუ რა საემიგრაციო პოლიტიკა აქვს მას. ვიცით, რომ აშშ-ს ახალ ადმინისტრაციას აქვს რადიკალურად სხვა შეხედულებები, ვიდრე წინა ადმინისტრაციას თუ ადმინისტრაციებს და ამ პოლიტიკის განხორციელება არის. ჩვენ პირიქით, ჩვენი მოქალაქეები დარჩნენ საქართველოში ეს არის ჩვენი პრიორიტეტი იმიტომ, რომ ჩვენი ქვეყანა მიდის წინ და მნიშვნელოვანია, ყველა ჩვენი მოქალაქე ჩართული იყოს ჩვენი ქვეყნის განვითარებაში," — განაცხადა შალვა პაპუაშვილმა.

კითხვაზე იყო თუ არა აღნიშნული გადაწყვეტილება განპირობებული იმ ფაქტით, რომ საქართველო სტრატეგიული პარტნიორი არ არის აშშ, პაპუაშვილმა განაცხადა, რომ "როგორც გრენლანდიასთან არ ვართ შუაში და ვენესუელასთან არ ვართ შუაში, ისევე არ ვართ შუაში პრეზიდენტ ტრამპის მიგრაციის პოლიტიკასთან".

"მე გარწმუნებთ, რომ ჩვენი პოლიტიკა არ განაპირობებს პრეზიდენტ ტრამპის პოლიტიკას მიგრაციის საკითხში, როგორც არ განაპირობა გრენლანდიის და ვენესუელას საკითხი. როგორც გრენლანდიასთან არ ვართ შუაში და ვენესუელასთან არ ვართ შუაში, ისევე არ ვართ შუაში პრეზიდენტ ტრამპის მიგრაციის პოლიტიკასთან, რომელიც ამ გადაწყვეტილებით დედამიწის ნახევარს შეეხო ლამის," — განაცხადა პაპუაშვილმა.

აშშ-ის სახელმწიფო დეპარტამენტი 75 ქვეყნის მოქალაქეებისთვის, მათ შორის, ქართველებისთვის საემიგრაციო ვიზების დამუშავებას აჩერებს, იმ მიზნით, რომ გაამკაცროს კონტროლი იმ განმცხადებლებზე, რომლებიც შესაძლოა მომავალში "სახელმწიფო ვალდებულებად" (public charge) იქცნენ. ამის შესახებ ინფორმაციას Fox News ავრცელებს.

• აშშ-ის სახდეპი 75 ქვეყანას, მათ შორის, საქართველოს საემიგრაციო ვიზების გაცემას უჩერებს — ქვეყნების ჩამონათვალი

შემდგომ ამერიკის საელჩო თბილისში განმარტა — ვის შეეხება ამერიკის ვიზებთან დაკავშირებული ცვლილებები. მათი ცნობით, " სახელმწიფო დეპარტამენტი ახორციელებს ყველა პოლიტიკის, რეგულაციისა და სახელმძღვანელო დოკუმენტის სრულ გადახედვას, რათა უზრუნველყოს, რომ მაღალი რისკის მქონე ქვეყნებიდან ჩამოსული იმიგრანტები არ გამოიყენებენ სოციალურ დახმარებას შეერთებულ შტატებში და არ გახდებიან საჯარო ტვირთი."

• აშშ-ს სავიზო შეზღუდვები ვრცელდება მხოლოდ საიმიგრაციო ვიზის აპლიკანტებზე და არა ტურისტულ ვიზებზე — საელჩოს განმარტება