13 წლის ბიჭმა დედისა და და-ძმის გადასარჩენად აღელვებულ ზღვაში 4 საათის განმავლობაში იცურა, რათა სამაშველო ჯგუფისთვის ხმა მიეწვდინა.

აფელბიების ოჯახი არდადეგებს ქუინდალაფში (ავსტრალია), პერთიდან 200 კილომეტრში მდებარე პატარა ქალაქში ატარებდა. პარასკევს, ზღვაში ყოფნისას, ძლიერმა ქარმა ოჯახს სერფინგის დაფა და კაიაკი წაართვა.

ჯოანმა თავის შვილს, 13 წლის ოსტინს, სთხოვა, კაიაკი ნაპირამდე წაეღო, რათა მაშველებისთვის დახმარება ეთხოვა. თუმცა, აღელვებულმა ზღვამ ოსტინს ნავი წაართვა და იძულებული გახადა, ნაპირამდე 4 კილომეტრი გაეცურა.

"მეგონა, რაღაც დავინახე წყალში. ძალიან მეშინოდა, თუმცა ჩემს თავს ვეუბნებოდი, რომ ამის გაკეთება შემეძლო", — ამბობს ოსტინი — "სუნთქვა მიჭირდა, მაგრამ დაღლილობას მაინც ვერ ვგრძნობდი".

"ზღვის ნაპირამდე რომ მივაღწიე, ძალაგამოცლილი წავიქეცი...მალევე ავდექი და 2 კილომეტრი ვირბინე, რათა ტელეფონამდე მივსულიყავი", — დასძინა მან.

და ოსტინმა სასწრაფო დახმარებას დაურეკა — "ვუთხარი, რომ ვერტმფრენი, თვითმფრინავი და ნავი მჭირდებოდა, რადგან ჩემი ოჯახი შუა ზღვაში იყო. ძალიან მშვიდად ვესაუბრებოდი, ალბათ, შოკში ვიყავი", — ამბობს ოსტინი.

იმ დროისთვის ოსტინმა არც კი იცოდა, ცოცხლები იყვნენ თუ არა ოჯახის წევრები. სასწრაფო დახმარებასთან საუბრის შემდეგ, ოსტინმა დაღლილობისგან გონება დაკარგა.

დასავლეთ ავსტრალიის პოლიციამ ზარი საღამოს 6 საათზე მიიღო და ოსტინის ოჯახის დასახმარებლად მალევე გაგზავნა სამაშველო ჯგუფი. ოსტინის დედა, და და ძმა, დაახლოებით ცხრის ნახევარზე იპოვეს, ნაპირიდან 15 კილომეტრის მოშორებით.

"ვიფიქრე, რომ ოსტინმა ნაპირამდე ვერ მიაღწია", — ამბობს ოსტინის დედა, ჯოანი, BBC-სთან.

გონების დაკარგვის შემდეგ, ოსტინი საავადმყოფოში გადაიყვანეს, რა დროსაც გაიგო, რომ მისი ოჯახი საღ-სალამათი იყო. "ის მომენტი არასდროს დამავიწყდება", — თქვა ოსტინმა.

"სამივე შვილი ჯანმრთელი და ცოცხალი მყავს. ამაზე უკეთესი რა შეიძლებოდა მომხდარიყო?" — ამბობს ოსტინის დედა.

დასავლეთ ავსტრალიის პრემიერმინისტრმა, როჯერ ქუქმა, სოციალურ ქსელებში ოსტინი "ნამდვილ გმირად" მოიხსენია. "ყოჩაღ, ოსტინ! ვამაყობთ შენით", — წერს ის სოციალურ ქსელში.

BBC-ის ცნობით, ოსტინი უკვე დაუბრუნდა სასწავლო პროცესს. მართალია, მას ცოტახნით ყავარჯნის გამოყენება მოუწევს, მაგრამ, საბედნიეროდ, ის და მისი ოჯახი ერთად და ბედნიერად არიან.