საქართველოს ეროვნული კინოცენტრის ინფორმაციით, კინოგადაღებების კუთხით ქვეყნის პოტენციალის შესასწავლად საქართველოს ჰოლივუდიდან ცნობილი ლოკაციის მენეჯერები და პროდიუსერები სტუმრობენ. მათი ვიზიტი 20 ივნისს დაიწყო.

კინოცენტრის ცნობით, ჰოლივუდის ცნობილი კინომწარმოებლების წარმომადგენლები ე.წ ლოკაციის მენეჯერები, რომლებსაც ისეთ ფილმებზე აქვთ ნამუშევარი როგორებიცაა: Transformers, Captain America, The Town, The Hangover, Sicario, Mission:Impossible, კინოინდუსტრიის ხელშეწყობის პროგრამის, გადაიღე საქართველოში ფარგლებში 20-დან 26 ივნისის ჩათვლით საქართველოს სხვადასხვა რეგიონებს დაათვალიერებენ და ერთი კვირის განმავლობაში თბილისს, რუსთავს, კახეთს, მცხეთას, ყაზბეგს, უფლისციხეს, წყალტუბოს, ზუგდიდსა და მესტიას, ასევე ანაკლიასა და ბათუმს მოინახულებენ. სწორედ აღნიშნული პირების რეკომენდაციაზეა დამოკიდებული ქვეყანაში ლოს-ანჯელესიდან გადამღები ჯგუფების ჩამოსვლა.

როგორც კინოცენტრი აცხადებს, ჰოლივუდელი პროდიუსერების დაინტერესება გამოიწვია საქართველოს ეკონომიკისა და მდგრადი განვითარების სამინისტროს მეწარმეობის განვითარების სააგენტოსა და ქართული საპროდიუსერო კომპანიების წარმომადგენლების მონაწილეობამლოს-ანჯელესში გამართულ ლოკაციების შოუზე, სადაც კინოწარმოების წახალისების პროგრამის პრეზენტაცია გაიმართა.

სახელმწიფო პროგრამის, გადაიღე საქართველოში, ქვეყანაში უკვე მიმდინარეობს რამდენიმე ინდურ და ევროპულ ფილმზე მუშაობა. პროგრამის ინიციატორები იმედოვნებენ, რომ საქართველო შეძლებს ჰოლივუდის დაინტერესებას.