შესწორება: უცხოურ მედიაზე დაყრდნობით, სტატიის თავდაპირველ ვერსიაში ნათქვამი იყო, რომ ძაღლებმა შინ დასაბრუნებლად 17 კილომეტრი გაიარეს, თუმცა, ზუსტი მანძილი უცნობია.

ასეთ ამბავს ალბათ მხოლოდ დისნეის ანიმაციაში თუ გადააწყდებოდი: როგორ დაუძვრნენ, სავარაუდოდ, გატაცებული ძაღლები ხელიდან ბოროტმოქმედს და დაბრუნდნენ შინ, თან — არც მეტი, არც ნაკლები, კორგის მეთაურობით.

რამდენიმე დღის წინ ინტერნეტსივრცე ერთმა გულისამაჩუყებელმა ვიდეომ მოიცვა: შვიდი ცუგა კუნაპეტ ღამეში მარშით მიემართება ავტობანზე. როგორც გაირკვა, ძაღლები ჩინეთში, გირინის პროვინციაში, დაიკარგნენ და შემდეგ გრძელი გზა გაიარეს შინ დასაბრუნებლად. ცუგების ჯგუფს, რომელშიც ოქროსფერი რეტრივერი, ლაბრადორი და გერმანული ნაგაზიც კი იყვნენ, კორგი, სახელად ბუთქუჩა, მიუძღოდა წინ თურმე...

ვიდეო ინტერნეტში ვირუსულად გავრცელდა და 230 მილიონზე მეტმა ადამიანმა ნახა. მათ შორის იყო ცხოველების ადგილობრივი თავშესაფრის მოხალისე, რომელმაც გადაწყვიტა, ძაღლების მათ პატრონებთან დაბრუნების მისია საკუთარ თავზე აეღო, ამიტომ, ადგა, ახლომდებარე სოფლები კარდაკარ მოიარა და ფლაერები ჩამოარიგა. ჩინეთის ამ მხარეში ადრეულ გაზაფხულზე ტემპერატურა ღამით ხშირად ჩამოდის ნულს ქვემოთ, ამასთან, ძაღლებს რამდენიმე დღის განმავლობაში არ ეჭამათ, ამდენად, მათ დასახმარებლად დრო არ იცდიდა.

თუმცა, მეორე დღესვე ცნობილი გახდა, რომ ცუგები პატრონებს დაუბრუნდნენ. აღმოჩნდა, რომ ბუთქუჩა და კიდევ ორი ძაღლი ერთ-ერთ სოფელში მცხოვრებ ქალს ეკუთვნოდა, რომელიც თავის ოთხფეხა მეგობრებს რამდენიმე დღის განმავლობაში უშედეგოდ ეძებდა; უკვე დანებებას აპირებდა, როცა საყვარელმა კორგიმ ისე შეინავარდა შინ, თითქოს არაფერი მომხდარა. ქალის თქმით, ძიების პროცესში აღმოაჩინა, რომ ძაღლები მეზობელ სოფლებშიც დაეკარგათ.

უცნობია, რა მიზეზით გაუჩინარდნენ ძაღლები, მაგრამ ზოგიერთი ინტერნეტმომხმარებელი ეჭვობს, რომ ცხოველები დასახოცად გაიტაცეს — ჩინეთის ზოგიერთ ნაწილში ძაღლის ხორცს საკვებად ისევ იყენებენ. სხვა მოსაზრებების თანახმად, ცუგებს გაყიდვას უპირებდნენ, ზოგი კი ფიქრობს, რომ ძაღლები თავადვე გაიპარნენ სახლებიდან.

ახლა კი, როცა ყველაფერი კარგად დასრულდა, ხალხი იმის სურვილსაც გამოთქვამს, ცუგების უჩვეულო თავგადასავალზე ფილმი ან ანიმაცია გადაიღონ.

"ამის ყურებამ თვალზე ცრემლი მომგვარა. ცუგები ადამიანების სამუდამო მეგობრები არიან", — წერს ერთ-ერთი ინტერნეტმომხმარებელი.