მუქარის შემცველი პოსტის შემდეგ, საქართველოში ირანის ელჩი, სეიედ ალი მოჯანი სოციალურ ქსელში წერს, რომ 1-ელ აპრილს, საქართველოს საგარეო უწყებას დაუკავშირდა და შეხვედრა გამართა.

ელჩის განცხადებაში ვკითხულობთ, რომ შეხვედრაზე "ორი ერისა და ორი ქვეყნის მრავალათასწლოვანი მეგობრული ურთიერთობების შესახებ" ისაუბრეს და დასძინა, რომ "ზედაპირული და მედიასაშუალებების ინტერპრეტაციებისგან განსხვავებით, დღეს ნათლად ჩანს, რომ ირანის ყოვლისმომცველი თავდაცვა ერთთვიანი პერიოდის შემდეგ ეფექტურია".

"დღეს, ბოლო მოვლენების ანალიზისა და სამოქალაქო ინფრასტრუქტურის წინააღმდეგ განხორციელებული თავდასხმების შედეგების განხილვის მიზნით, ჯერ დავუკავშირდი საქართველოს საგარეო საქმეთა სამინისტროს, შემდეგ კი შეხვედრა გავმართე.

შედგა კონსტრუქციული საუბარი სპარსეთის ყურის ვითარების, ენერგეტიკის მომავლის, ორი ერისა და ორი ქვეყნის მრავალათასწლოვანი მეგობრული ურთიერთობების შესახებ, რომელიც მოიცავდა მნიშვნელოვან საკითხებს.

ირანი ზეწოლის პირისპირ არ მოქმედებს ნაჩქარევად, არამედ ეყრდნობა შიდა სტაბილურობასა და საკუთარ სტრატეგიულ შესაძლებლობებს.

ზედაპირული და მედიასაშუალებების ინტერპრეტაციებისგან განსხვავებით, დღეს ნათლად ჩანს, რომ ირანის ყოვლისმომცველი თავდაცვა ერთთვიანი პერიოდის შემდეგ ეფექტურია. მრავალი ქვეყანა, რომლის ბაზებსაც აშშ იყენებდა, უკვე იწყებს საკუთარი გათვლებისა და მიდგომების გადახედვას.

ბოლო წლების გამოცდილებამ აჩვენა, რომ დიდი ძალების ინტერვენციული პოლიტიკა ვერ უზრუნველყოფს მდგრად უსაფრთხოებას და ვერ იძლევა ეკონომიკური სტაბილურობის გარანტიას.

რეალობა მარტივია:

რეგიონული უსაფრთხოება თანამშრომლობისა და ურთიერთგაგების შედეგია და არა ძვირადღირებული საგარეო კონკურენციის გაფართოებისა," — წერს ელჩი.

ამ დროისთვის, საგარეო უწყებას აღნიშნულ შეხვედრაზე ინფორმაცია არ გაუვრცელებია.

შეგახსენებთ, რომ 30 მარტს მარკო რუბიოსა და ირაკლი კობახიძეს შორის სატელეფონო საუბარი შედგა, რის შემდეგაც ირანის ელჩმა საქართველოში სეიედ ალი მოჯანმა სოციალურ ქსელში მუქარის შემცველი განცხადება გამოაქვეყნა.

მოჯანი წერდა, რომ "ისინი, ვინც გუშინ დონალდ ტრამპს მხარი აუბეს, დღეს იძულებულნი არიან ამ ნაბიჯის ფასი გადაიხადონ". მისი თქმით, იმ ქვეყნებს, რომლებიც საკუთარ ტერიტორიასა და სივრცეს "გარე ავანტიურისტებს უთმობენ“, საბოლოოდ შიდა კრიზისებთან გამკლავება უწევთ. მოგვიანებით, აღნიშნული პოსტი სოციალურ ქსელში აღარ იძებნებოდა.

• მარკო რუბიოსა და კობახიძის საუბრის შემდეგ, ირანის ელჩი საქართველოში მუქარის შემცველ განცხადებას აქვეყნებს
• მარკო რუბიო ირაკლი კობახიძეს ტელეფონით ესაუბრა