"ჩემი მონაწილეობა მაქვს მიღებული იმაში, რომ გერმანიის სახელი ქართველების თვალში ყოფილიყო მეგობრის და გვერდში მდგომის," — განაცხადა შალვა პაპუაშვილმა პრესასთან საქართველოსა და გერმანიის ურთიერთობებზე საუბრისას.

"ჩვენ ვხედავთ ამგვარ, მართლაც, მთელი ერის არაფრად ჩაგდების პოლიტიკას, აქედან ჩვენ ჩვენი დასკვნები უნდა გამოვიტანოთ. ძალიან სამწუხაროა, რომ ელჩის და ზოგიერთი გერმანელი ბიუროკრატის ქცევით ისეთი ზიანი მიაყენა გერმანიის ხელისუფლებამ გერმანიის რეპუტაციას, რომ ამას წლები დასჭირდება, ამ მართლაც დაზიანებული რეპუტაციის აღდგენას ქართველების თვალში. იმ რეპუტაციის, რომელსაც მათ შორის მეც [ვაშენებდი]. ჩემი მონაწილეობა მაქვს მიღებული იმაში, რომ გერმანიის სახელი ქართველების თვალში ყოფილიყო მეგობრის და გვერდში მდგომის. დღეს, ქედმაღლურად, ქართველებზე ზემოდან მაყურებელი ქვეყნის როლს ირგებს [გერმანია], რომელიც პირდაპირ გვეუბნება, რომ ადამიანებად არ გვთვლის. მაშინ, როდესაც გერმანიის კონსტიტუციის პირველი მუხლი იწყება სიტყვებით, რომ ადამიანის ღირსება არის ხელშეუხებელი. ჩვენს ღირსებას ეხებიან, ჩვენს უფლებას ავირჩიოთ ჩვენი ხელისუფლება, ჩვენს სუვერენიტეტს ეხებიან. ამგვარი, მართლაც არასერიოზული, გერმანიისთვის შეუფერებელი, ქცევით ჰანს გერშერი საფლავში ტრიალებს, რომ უყურებს რას დაემსგავსა გერმანიის საგარეო პოლიტიკა საქართველოსთან მიმართებით."

შეგახსენებთ, რომ შალვა პაპუაშვილი:

2000-2001 წლებში იყო საადვოკატო ბიურო Heimes&Muller-ის ადვოკატის თანაშემწე;

2003-2007 წლებში იყო გერმანიის ტექნიკური თანამშრომლობის საზოგადოების (GTZ) უფროსი სამართლებრივი ექსპერტი;

2007-2015 წლებში იყო გერმანიის საერთაშორისო თანამშრომლობის საზოგადოების (GIZ) ჯგუფის ხელმძღვანელი;

2015-2017 წლებში იყო გერმანიის საერთაშორისო თანამშრომლობის საზოგადოების (GIZ) პროგრამის ხელმძღვანელის მოადგილე;

2017-2020 წლებში იყო გერმანიის საერთაშორისო თანამშრომლობის საზოგადოების (GIZ) საქართველოს გუნდის ხელმძღვანელი.