გქონიათ ისეთი მომენტი, მეგობრებთან საუბრისას თვალწინ რომ გიდგებათ ბავშვობაში ნანახი კადრები მულტფილმიდან, რომელიც დისკზე გქონდათ ჩაწერილი და დაუსრულებლად უყურებდით, მაგრამ ახლა სახელს ვერ იხსენებთ? ამ დროს კი თქვენ ირგვლივ მყოფები კი ვერ ხვდებიან, რაზე საუბრობთ. რამდენიმე ასეთი შემთხვევის შემდეგ, შეიძლება, ეჭვიც კი შეგეპაროს საკუთარ თავში — იქნებ ჩემი ბავშვური წარმოსახვის ნაწილი იყო?!

ამ სტატიაში 5 ისეთ მულტფილმს გავიხსენებთ, რომლებიც, სავარაუდოდ, თქვენს გონებას სადღაც მიკარგულში, ბუნდოვნად ახსოვს, მაგრამ წლებია, აღარ გინახავთ.

1. Spirit: Stallion Of The Cimarron (2002)

სპირიტი ერთ-ერთი პირველი მულტფილმია, რომელიც ბავშვობის გახსენებისას თვალწინ მიდგება და აქამდე მუდამ მეგონა, რომ მას მუსტანგი ერქვა. ბევრი არაფერი მახსოვს სპირიტიდან — არ მახსოვს, რა ხდება სიუჟეტში, მაგრამ მახსოვს მისი თბილი ფერები და ველური ცხენი, რომელიც კლდეებზე დახტის და მთელი სისწრაფით მიქრის თავისუფლების მოსაპოვებლად.

მულტფილმის სიუჟეტი დაკარგული თავისუფლების დაბრუნებისთვის ბრძოლას ეხება. ის გვიყვება ცხენზე, სახელად სპირიტზე, რომელიც ტყვეობაში აღმოჩნდება და მთელი ფილმის განმავლობაში თავის დასაღწევად და ოჯახთან დასაბრუნებლად იბრძვის. გარდა ემოციური და შთამაგონებელი სიუჟეტისა, სპირიტი ერთ-ერთი ბოლო დიდი პროექტია, სადაც ანიმაციური კადრები არა მხოლოდ კომპიუტერით, არამედ ხელითაც იყო დახატული, რაც მის საოცრად ცოცხალ და ლამაზ კადრებშიც იგრძნობა.

2. Flushed Away (2006)

თუ გახსოვთ ვირთხები, რომლებიც თავს უნიტაზში ირეცხავენ და კანალიზაციაში დაცურავენ, ხელში ლალის ქვა უჭირავთ, რაღაცას გაურბიან ან მისდევენ, ასევე მომღერალი ლოკოკინები, მსოფლიო ჩემპიონატი და ვირთხის მდიდრული სახლი, მაშ, თქვენც გინახავთ Flushed Away. და თუ არ იცით, რაზე ვსაუბრობ, ამ აღწერით ნუ განსჯით მულტფილმს — მანამ, სანამ რატატუი გამოჩნდებოდა, როდი და რიტა იყვნენ პირველი ვირთხები, რომლებმაც ეკრანებიდან თავები შეგვაყვარეს.

ეს მულტფილმი ისეთი ემოციებითა და სენტიმენტებით ვერ აგავსებთ, როგორც სპირიტი, თუმცა თავისი სხარტი, ბრიტანული იუმორითა და აბსურდული სიუჟეტით აუცილებლად გაგამხიარულებთ და შესაძლოა, კანალიზაცია სხვა თვალითაც კი დაგანახოთ.

3. Monster House (2006)

ვისაც საშინელებათა ფილმის ყურებით გამოწვეული ადრენალინი, სხეულის დაძაბულობა და მოულოდნელ მომენტებზე შეხტომა ბავშვობიდან უყვარს, ალბათ ეს მულტფილმიც მოსწონდა პატარაობაში. მე პირადად, ამ ადამიანთა სიაში არ ვარ, მაგრამ მაინც კარგად მახსოვს მონსტრი სახლი, რომელიც დიდად არ ჰგავდა სხვა მულტფილმებს, რომლებსაც ბავშვობაში ვუყურებდი.

მულტფილმი გვიყვება მოზარდ ბიჭზე, სახელად დიჯეიზე, რომლის მეზობელიც ცოცხალ, მონსტრ სახლში ცხოვრობს. დიჯეისა და მის მეგობრებს არავინ უჯერებს, როცა ცდილობენ, რომ მეზობლის უჩვეულო საცხოვრებლის შესახებ უფროსებს შეატყობინონ, ამიტომ გადაწყვეტენ, თავად შევიდნენ სახლში და შიგნიდან გაანადგურონ ის. დასასრულს არ დაგისპოილერებთ — თუ გიყვართ ასეთი ტიპის ფილმები თუ ანიმაციები, შეგიძლიათ თავად ნახოთ. მე კი, ვიცი, რომ არც მონსტრ სახლსა და არც რომელიმე საშინელებათა ფილმს ახლო მომავალში არ ვუყურებ.

4. Shark Tale (2006)

უცნაური თევზები თუ გიდგებათ თვალწინ, რომელთაც თითქოს უილ სმიტისა და ანჯელინა ჯოლის სახეები აქვთ, მაშინ ზვიგენების ამბავიც გინახავთ და მართალიც ხართ — ამ თევზებს მართლა უილ სმიტისა და ანჯელინა ჯოლის სახეები აქვთ. მულტფილმი თავისი განსხვავებული პერსონაჟებით წყალქვეშა სამყაროს დრამებზე გვიყვება.

სიუჟეტი პატარა თევზზეა, რომელიც ყველას დააჯერებს, რომ ზვიგენი მოკლა და წყალქვეშა სამყაროს ვარსკვლავი გახდება. ვხვდებით ვეგეტარიანელ ზვიგენსაც, რომელმაც ხორცის ჭამას დელფინად გადაცმა არჩია. ზვიგენების ამბავი იმ გადავიწყებული მულტფილმების სიაში შედის, რომელიც ალბათ ღირდა კიდეც, რომ დაგვევიწყებინა.

5. Home on the Range (2004)

ამ მულტფილმმა ვერც კრიტიკოსებისგან დაიმსახურა მთლად კარგი შეფასება და, თურმე, ვერც მაყურებელი მოუხიბლავს, მაგრამ ჩემი 5 წლის ვერსიის გული კი მოიგო და ამისთვის მხოლოდ ძროხების მოღიმარი სახეების დანახვა დამჭირდა.

ცხოველების ისტორიები თუ გამხიარულებთ, ამ ძროხების ამბითაც ისიამოვნებთ: სამი განსხვავებული ხასიათის ძროხა გადაწყვეტს, დაიჭირონ საშიში დამნაშავე, რომელიც თავისი სიმღერით ძროხებს აჰიპნოზებს, მიიღონ ფულადი ჯილდო და საკუთარი ფერმა აუქციონზე გაყიდვისგან გადაარჩინონ. მართალია, ცოტა აბსურდულია, მაგრამ გასართობად ნამდვილად ღირს.